ქუთაისში ახალგაზრდა ქალის მკვლელობის საქმეზე კიდევ ორი პირი დააკავეს. ინფორმაცია აღნიშნულის შესახებ “ნეტგაზეთს” საქართველოს შინაგან საქმეთა სამინისტროში დაუდასტურეს.
უწყებაში აცხადებენ, რომ ორივე დაკავებულს ბრალად დანაშაულის შეუტყობინებლობა ედება (სსკ-ის 376).
გუშინ ამავე საქმეზე შსს-მს განზრახ მკვლელობის ბრალდებით ერთი პირი დააკავა. უწყებაში აცხადებენ, რომ გამოძიების ვერსიით, ბრალდებულმა ქალმა მიმდინარე წლის 18 ივლისს ქუთაისში, ზვიად გამსახურდიას გამზირზე მდებარე საცხოვრებელ ბინაში, თავის მეგობართან – 1989 წელს დაბადებულ ე.ჩ.-სთან სტუმრად ყოფნის დროს, ურთიერთშელაპარაკების ნიადაგზე, მასპინძელს ცივი იარაღით რამდენიმე ჭრილობა მიაყენა და შემთხვევის ადგილიდან მიიმალა. მიყენებული დაზიანებების შედეგად ე.ჩ. ადგილზე გარდაიცვალა.
შსს-ში ამბობენ, რომ პოლიციამ დანაშაულის ჩადენის იარაღი – დანა ნივთმტკიცებად ამოიღო, ბრალდებული კი დანაშაულს აღიარებს.
