ახალი ამბებისამხრეთ კავკასიის ამბები

სომხეთ-აზერბაიჯანის განახლებულ კონფლიქტს უკვე 16 ადამიანი ემსხვერპლა

14 ივლისი, 2020 • 2167
სომხეთ-აზერბაიჯანის განახლებულ კონფლიქტს უკვე 16 ადამიანი ემსხვერპლა

სომხეთისა და აზერბაიჯანის შეიარაღებული დაპირისპირება 14 ივლისს მძიმე სააერტილერიო ცეცხლითა და დრონების გამოყენებით გაგრძელდა.

განახლებულ კონფლიქტს ორივე მხრიდან, სულ მცირე, 16 ადამიანის სიცოცხლე ემსხევრპლა. დაპირისპირება კვირას, 12 ივლისს განახლდა.

აზერბაიჯანის თანახმად, ვითარების დაძაბვიდან ამ დრომდე 11 ჯარისკაცი და ერთი სამოქალაქო პირი დაკარგეს, სომხეთი კი აცხადებს, რომ 4 ჯარისკაცი დაეღუპათ. ინფორმაციას Associated Press ავრცელებს.

ყარაბაღის კონფლიქტის მხარეები რეგულარულად ადანაშაულებენ ერთმანეთს ცეცხლის შეწყვეტის შესახებ შეთანხმების დარღვევაში. ამჯერად შედარებით ფართომასშტაბიან დაპირისპირებას ადგილი აქვს ყარაბაღიდან შორს, სომხეთ-აზერბაიჯანის საზღვარზე, ტავუშის/თოუზის პროვინციაში, რაც იშვიათობაა.

სიტუაციის დაძაბვამდე რამდენიმე დღის წინ აზერბაიჯანის პრეზიდენტი ილჰამ ალიევი ყარაბაღთან დაკავშირებით მოლაპარაკებებიდან შესაძლო გასვლით დაიმუქრა და უარყო შეხედულება, რომლის თანახმადაც „კონფლიქტის სამხედრო გადაწყვეტა არ არსებობს“, — ამ პოზიციას ხშირად ახმოვანებს სომხეთის პრემიერ-მინისტრი ნიკოლ ფაშინიანი.

სამხრეთ კავკასიის ამ ორ ქვეყანას შორის მთიანი ყარაბაღის კონფლიქტი 1988 წელს დაიწყო. აზერბაიჯანი მიიჩნევს, რომ მთიანი ყარაბაღი და შვიდი მიმდებარე რაიონი, — აზერბაიჯანის 20%, — სომხეთის შეიარაღებული ძალების ოკუპაციაშია, რასაც კატეგორიულად უარყოფს სომხეთი.

1994 წელს მხარეებმა ხელი მოაწერეს ცეცხლის შეწყვეტის რეჟიმს, მაგრამ საერთაშორისო ორგანიზაციების ეგიდით წარმოებული მოლაპარაკებები ამ ორ ქვეყანას შორის დღემდე წარუმატებლად მიიჩნევა. ორივე მხარე გამუდმებით ერთმანეთს ადანაშაულებს ცეცხლის შეწყვეტის შესახებ რეჟიმის დარღვევაში.

მასალების გადაბეჭდვის წესი