ნეტგაზეთი | ვფიქრობ, გახარია იმსახურებს რომ “ქართული ოცნების” სიის პირველი ნომერი იყოს – თალაკვაძე ვფიქრობ, გახარია იმსახურებს რომ “ქართული ოცნების” სიის პირველი ნომერი იყოს – თალაკვაძე – Netgazeti
RU | GE  

ვფიქრობ, გახარია იმსახურებს რომ “ქართული ოცნების” სიის პირველი ნომერი იყოს – თალაკვაძე

პარლამენტის თავმჯდომარეს, არჩილ თალაკვაძეს მიაჩნია, რომ პრემიერ-მინისტრი გიორგი გახარია “ქართული ოცნების” სიის პირველ ნომრად დასახელებას იმსახურებს, თუმცა დასძენს, რომ ეს გადაწყვეტილება გუნდმა უნდა მიიღოს. როგორც თალაკვაძემ “რუსთავი 2”-ის ეთერში განაცხადა, გახარიას ერთ-ერთი დამსახურება კორონავირუსთან ეფექტური ბრძოლაა.

“ვფიქრობ, ის იმსახურებს იმას, რომ “ქართული ოცნების” სიის პირველი ნომერი იყოს, თუმცა ეს გუნდის მისაღები გადაწყვეტილებაა. ამ გადაწყვეტილებას ივლის-აგვისტოში გავახმოვანებთ, მას შემდეგ, რაც სიის ფორმირება დასრულდება. ჩვენი ქვეყნისთვის ძალიან რთულ მომენტში, როცა ქვეყანა ფაქტობრივად ეგზისტენციური გამოწვევის წინაშე იდგა Covid-19-ის გამო, მან პროცესების ეფექტური მართვა უზრუნველყო. მან უზრუნველყო ის, რომ ქვეყანაში ვირუსის გავრცელების შეკავება მოხდა და ქვეყანამ დროულად შეძლო დაბრუნებოდა ისეთ ამოცანებს, როგორიც არის ეკონომიკის სტაბილიზაცია და აღდგენა”,-განაცხადა თალაკვაძემ.

ჟურნალისტის კითხვაზე, გახარია, როგორც შინაგან საქმეთა მინისტრი 20 ივნისის ღამეს, იმსახურებს თუ არა საარჩევნო სიის პირველ ნომრად დასახელებას. თალაკვაძე პასუხობს: ” ეს შეკითხვა რამდენჯერაც არ უნდა გამიმეოროთ, ერთი და იგივე პასუხი მექნება… როდესაც სახეზე იყო შეტევა კონსტიტუციურ ინსტიტუტზე  და სახეზე იყო ორსაათიანი ძალადობა პოლიციელებზე, პოლიციამ და შსს-მ ადეკვატურად იმოქმედეს. შესაბამისად, მაშინ მინისტრმა და სამინისტრომ იმოქმედეს იმ ფარგლებში, როცა მათ უნდა შეესრულებინათ კონსტიტუციითა და კანონით დაკისრებული ვალდებულება.”

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.