აშშ-ის შტატ მინესოტას დედაქალაქის, მინეაპოლისის საქალაქო საბჭოს წევრების უმრავლესობამ, 9 წევრმა, გამოაცხადა, რომ აპირებდნენ, ქალაქის პოლიციის დეპარტამენტისთვის დაფინანსება შეეწყვიტათ და საერთოდ გაუქმებინათ, იუწყება CNN.
„გვსურს გავაუქმოთ პატრულირება მინეაპოლისში, როგორიც ის ვიცით და ავაგოთ ჩვენი საზოგადოება საჯარო უსაფრთხოების ახალ მოდელზე, რომელიც მართლაც იცავს საზოგადოების წევრებს“, — აცხადებს საბჭოს თავმჯდომარე ლიზა ბენდერი.
„[მერი] გამოხატავს სურვილს, იმუშაოს [პოლიციის] უფროს [მედარია] არადონდოსთან ღრმა, სტრუქტურული რეფორმებისთვის და სისტემური რასიზმის აღმოფხვრისთვის“, — აცხადებს მისი პრეს-სპიკერი.
რა ხდება?
25 მაისს მინესოტას შტატის დედაქალაქ მინეაპოლისში პოლიციის ოფიცრებმა დააკავეს აფროამერიკელი მოქალაქე ჯორჯ ფლოიდი, რომელიც, როგორც აუტოფსიამ დაადგინა, ერთ-ერთი ოფიცრის, დერეკ ჩაუვინის მიერ გამოყენებული ილეთის (მან ძირს დაწოლილ ფლოიდს ყელზე მუხლი დააჭირა) შედეგად გარდაიცვალა.
პოლიციელები სამსახურიდან გაათავისუფლეს, ოთხივე მათგანს სხვადასხვა სიმძიმის ბრალიც წარედგინა, ხოლო აშშ-ის 50-ივე შტატის ქალაქში ჩატარდა საპროტესტო აქციები — დემონსტრანტები ითხოვენ სამართლიანობასა და ქვეყანაში პოლიციის მხრიდან აფროამერიკელების მიმართ სასტიკი მოპყრობის შეწყვეტას. ამასთან ერთად, საპროტესტო აქციების დროს შექმნილი არეულობით ზოგიერთმა მოქალაქემ ისარგებლა და მაღაზიების ძარცვით დაკავდა.
ამასთან ერთად, მომიტინგეების ნაწილი და აშშ-ის კონგრესის ზოგი წევრი პოლიციის დეპარტამენტების გაუქმებას ითხოვს.