ნეტგაზეთი | ცენზორის მოთხოვნით, Designated Survivor-ის ერთ-ერთ სერიაზე თურქეთში წვდომა შეიზღუდა ცენზორის მოთხოვნით, Designated Survivor-ის ერთ-ერთ სერიაზე თურქეთში წვდომა შეიზღუდა – Netgazeti

ცენზორის მოთხოვნით, Designated Survivor-ის ერთ-ერთ სერიაზე თურქეთში წვდომა შეიზღუდა

კომპანია Netflix-მა თურქეთის ტერიტორიაზე სერიალ “ბოლო კანდიდატის”(Designated Survivor) ერთ-ერთ სერიაზე წვდომა შეზღუდა მას შემდეგ, რაც შესაბამისი მოთხოვნით მას თურქულმა მარეგულირებელმა მიმართა. ინფორმაციას ავრცელებენ ამერიკული გამოცემები- Variety  და Deadline.

ცნობების თანახმად, საუბარია სერიალის მეორე სეზონის მეშვიდე ეპიზოდზე, რომელშიც თურქეთის გამოგონილი პრეზიდენტი ფათიჰ თურანია წარმოდგენილი. ის აშშ-ში იმყოფება ნატოს სამიტზე დასასწრებად და იქ ამერიკელ კოლეგასაც ხვდება, პარალელურად კი სამშობლოში ოპოზიციის მძლავრი კრიტიკის ქვეშაა. ამასთან, სერიაში ჩანს გამოგონილი პერსონაჟი სახელად ნური შაჰინი, რომელზეც ნათქვამია, რომ ცხოვრობს აშშ-ში და თურქეთში გადატრიალების მოწყობას გეგმავს. პერსონაჟი შეფასებულია, როგორც “ბოლო იმედი დემოკრატული და სეკულარული თურქეთისთვის”.

“თურქული მარეგულირებლის მოთხოვნის შემდეგ ეპიზოდი ამოვიღეთ Netflix-დან მხოლოდ თურქეთში, ადილობრივი კანონის დასაცავად”, – ნათქვამია კომპანიის განცხადებაში, რომელსაც ზემოაღნიშნული გამოცემები ავრცელებენ.

Variety-ის თანახმად, 2019 წელს ცხრა შემთხვევა გამოვლინდა, როცა კომპანიას ცენზორების მოთხოვნების გათვალისწინება მოუხდა მსოფლიოს მასშტაბით.

“თურქეთის რადიოსა და ტელევიზიის უმაღლესი საბჭოს” ზემოქმედების ბერკეტები გასულ წელს მეტად გაფართოვდა. თურქული Bianet-ის ცნობით, 2019 წელს თურქეთის საკანონმდებლო მაცნეში გამოქვეყნდა კანონი, რომლის თანახმადაც, ინტერნეტ პლატფორმებმა, როგორიცაა Netflix, ლიცენზია სწორედ მარეგულირებლისაგან უნდა მიიღონ. აღნიშნულმა პლატფორმებმა უნდა დააფუძნონ ადგილობრივი კომპანიები თურქეთში და გადაიხადონ გადასახადები.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან