კორონავირუსის გამო თერჯოლის მუნიციპალიტეტში სოფელი ღვანკითი ჩაიკეტა. ბლოკ-საგუშაგოები სოფლის შესასვლელ-გასასვლელებთან დილის 6 საათიდან მოეწყო. საგუშაგოებზე თავდაცვის სამინისტროს და შინაგან საქმეთა სამინისტროს თანამშრომლები ერთობლივად პატრულირებენ.
გუშინ, 22 აპრილს, კორონავირუსი ღვანკითის კიდევ 4 მცხოვრებს დაუდასტურდა. ამით სოფელში ინფიცირებულთა რიცხვი 10-მდე გაიზარდა. სწორედ ამის გამო მიიღეს სოფლის სრულ იზოლაციაში მოქცევის გადაწყვეტილება.
“სოფელ ღვანკითში ინფიცირებულთა რაოდენობა გაიზარდა. გუშინ გვიან ღამით გადავწყვიტეთ, რომ ღვანკითი მთლიანად დაიხუროს გარკვეული პერიოდით,” – განაცხადა იმერეთში სახელმწიფო რწმუნებულმა ზვიად შალამბერიძემ.
სოფელი ღვანკითი თერჯოლიდან დაახლოებით 2 კილომეტრითაა დაშორებული. სოფელში არ მუშაობს მაღაზია, არ არის არც აფთიაქი. რაიონულ ცენტრთან სიახლოვის გამო იზოლაციაში მოქცევამდე მოსახლეობა პროდუქტების შესაძენად ძირითადად თერჯოლაში დადიოდა.
სოფელ ღვანკითში 705 ოჯახი ცხოვრობს.