სომხური მედიაგამოცემა Hetq-ის თანახმად, სომხეთის პარლამენტის წარმომადგენელმა მათ განუცხადა, რომ პარლამენტის წევრებს Covid-19-ზე ტესტირება ჩაუტარდებათ.

პარლამენტის ბიუროს ხელმძღვანელის მოადგილემ, ლილიტ მინასიანმა უარყო გავრცელებული ცნობები, რომ პარლამენტის თანამშრომელს Covid-19 დაუდასტურდა და განაცხადა, რომ ტესტირებას აქვს „პრევენციული სახე“.

ლილიტ მინასიანის თანახმად, რამდენიმე პარლამენტარს, რომელიც ყარაბაღში არჩევნების სამეთვალყურეოდ იმყოფებოდა, უკვე ჩაუტარდა ტესტირება და კორონავირუსი არ აღმოაჩნდათ.

ჯერჯერობით უცნობია, როდის ჩაუტარდებათ პარლამენტის წევრებს ტესტირება.

21 აპრილის მონაცემებით, სომხეთში კორონავირუსით ინფიცირების 1401 შემთხვევაა ოფიციალურად დადასტურებული.

ჩატარებულია 13929 ტესტი. 609 პაციენტი გამოჯანმრთელდა, 24 დაიღუპა. დანარჩენები მკურნალობას აგრძელებენ.