COVID-19-ით დაავადებული პაციენტები, რომლებმაც სამკურნალოდ ექსპერიმენტული პრეპარატი Remdevisir მიიღეს (თავდაპირველად ებოლასთვის შექმნილი წამალი, რომლის ეფექტურობაც კორონავირუსის წინააღმდეგ დამტკიცებული არ არის), სწრაფად გამოჯანმრთელდნენ და მათი დიდი ნაწილი სახლში რამდენიმე დღეში დაბრუნდა. ინფორმაციას ამის შესახებ CNN ავრცელებს STAT News-ზე დაყრდნობით.
როგორც STAT News წერს, ამ პრეპარატით მკურნალობის პროექტის ხელმძღვანელი ექიმი აცხადებს, რომ პაციენტები მონაწილეობას იღებდნენ კლინიკურ ცდაში. ყველა მათგანს აღენიშნებოდა მწვავე რესპირატორული სიმპტომები და მაღალი ტემპერატურა, მაგრამ ამ პრეპარატით მკურნალობის შემდეგ ერთ კვირაზე ნაკლებ დროში მოახერხეს საავადმყოფოს დატოვება.
„სასიხარულო ისაა, რომ ჩვენი პაციენტების დიდი ნაწილი უკვე გავწერეთ. დაიღუპა მხოლოდ ორი“, — აცხადებს კეტლინ მალანი, ჯგუფის ხელმძღვანელი და ჩიკაგოს უნივერსიტეტის ინფექციური დაავადებების სპეციალისტი STAT News-ის მიერ მოპოვებულ ვიდეოში.
თუმცა, CNN-ის ცნობით, პროექტში ჩართული არ არის საკონტროლო ჯგუფი, რის გამოც რთული სათქმელია, რეალურად ეხმარება თუ არა პრეპარატი პაციენტებს გამოჯანმრთელებაში. საკონტროლო ჯგუფის არსებობის შემთხვევაში ზოგი პაციენტი არ იღებს ტესტირებად პრეპარატს, რაც საშუალებას მისცემდა ექიმებს, დაედგინათ, რამდენად ეფექტურია პრეპარატი.
პრეპარატი Remdevisir კომპანია Gilead Sciences-მა შექმნა ებოლას სამკურნალოდ, თუმცა ამ შემთხვევაში პრეპარატი წარმატებული არ აღმოჩნდა. ცხოველებზე ცდებმა კი აჩვენა, რომ შეიძლება პრეპარატი გამოყენებული იყოს კორონავირუსების სამკურნალოდ. თებერვალში ჯანდაცვის მსოფლიო ორგანიზაციაში განაცხადეს, რომ Remdevisir-ს ჰქონდა COVID-19-ის მკურნალობის პოტენციალი.
