აშშ-ის კონგრესის ორივე პალატამ, სენატმა და წარმომადგენელთა პალატამ მიიღო კანონპროექტი, რომლის თანახმადაც ახალი კორონავირუსის — COVID-19-ის მიერ გამოწვეული ეკონომიკური შედეგების გასამკლავებლად 2 ტრილიონი დოლარი დაიხარჯება. ინფორმაციას ამის შესახებ CNN ავრცელებს.

კანონპროექტი ცოტა ხნის წინ დაამტკიცა წარმომადგენელთა პალატამ, იქამდე კი სენატში მიიღეს, 96 ხმით 0-ის წინააღმდეგ. ახლა მის ძალაში შესასვლელად მხოლოდ პრეზიდენტ ტრამპის ხელმოწერაა საჭირო. იქამდე ტრამპმა სენატის მიერ კანონის მიღების შემდეგ ამერიკას „მიულოცა“.

რას ითვალისწინებს კანონპროექტი?

კანონპროექტს, რომელსაც [ეკონომიკის] სტიმულირების პაკეტს უწოდებენ, უზრუნველყოფს ამერიკელების დახმარებას ფულადი სახსრებით. მოქალაქეები ფულს ჩეკის სახით მიიღებენ.

დახმარება დამოკიდებულია წლიურ შემოსავალზე: ცალკეული პირი, ვისი შემოსავალიც წელიწადში 75,000 აშშ დოლარი ან ნაკლებია, 1200 დოლარს მიიღებს. დაქორწინებული პირების შემთხვევაში ზედა ზღვარი 1200 დოლარის მიღებისთვის 150 000-დოლარიანი წლიური შემოსავალია. ყოველ შვილზე წყვილი დამატებით 500 დოლარს მიიღებს.

წლიური შემოსავლის მატებასთან ერთად იკლებს დახმარების დონეც. მათთვის, ვისი წლიური შემოსავალიც წელიწადში 99 000 დოლარია (198 000 დაქორწინებული წყვილის შემთხვევაში) დახმარება გათვალისწინებული არაა.

გარეკანის ფოტო: EPA