72 წლის მღვდელი ჯუზეპე ბერარდელი, რომელიც ბერგამოს პროვინციაში პატარა ქალაქ კასნიგოს ეკლესიაში მსახურობდა, კორონავირუსით გარდაიცვალა. ის ერთ-ერთია იმ 30 მღვდელთაგან, რომელიც ვირუსმა იმსხვერპლა.

ბერგამოს ყველა  საავადმყოფო  კორონავირუსით ინფიცირებულებითაა სავსე. ექიმებს არ ჰყოფნით რესპირატორები და ხელოვნური სუნთქვის აპარატები. როგორც იტალიური გამოცემა TGCOM24 წერს ჯუზეპე ბერარდელიმ თავისი რესპირატორი მასზე ახალგაზრდა უცნობ პაციენტს დაუთმო.

მას შემდეგ, რაც მღვდელს კორონავირუსი დაუდგინეს და საავადმყოფოში მოათავსეს, მრევლმა ჯუზეპე ბერარდელისათვის ფული შეაგროვა და რესპირატორი თავისი სახსრებით იყიდა. თუმცა მღვდელმა უარი თქვა რესპირატორის გამოყენებაზე და სხვას დაუთმო.

„ის იყო უშუალო ადამიანი. ეხმარებოდა ყველას, მორწმუნეებსაც და არამორწმუნეებსაც. შეხვედრისას ასე ესალმებოდა ხალხს  – „მშვიდობა და სიკეთე“. ის ყოველთვის კეთილგანწყობილი იყო ყველასადმი და უამრავი საქველმოქმედო აქცია აქვს ჩატარებული. მას უყვარდა ყველა. მისი მრევლის ყოფილი წევრები წლების მანძილზე ჩამოდიოდნენ სხვადასხვა ქალაქებიდან, რომ პადრე ენახათ. მას წარმოუდგენელი უნარები ჰქონდა მრევლის წევრების ეკონომიკური პრობლემების გადასაჭრელად. დონ ჯუზეპე მოკვდა როგორც მღვდელი“ ,– წერს მღვდლის შესახებ ქალაქ კასნიგოს მერი ჯუზეპე  იმბერტი.

დონ ჯუზეპე ბერარდელი ლოვერეს საავადმყოფოში 23 მარტს გარდაიცვალა. COVID-19-ის ეპიდაფეთქების შემდეგ იტალიაში ვირუსით სულ 30 მღვდელი გარდაიცვალა, მათგან 16 ბერგამოს პროვინციიდან იყო.