თბილისის ინფექციური საავადმყოფოს სამედიცინო დირექტორის, მარინა ეზუგბაიას თქმით ინფექციურ საავადმყოფოში ამჟამად კორონავირუსით დაინფიცირებული 27 პაციენტი მკურნალობს, აქედან კი ოთხი 14 წელს ქვემოთაა.
ეზუგბაიას თქმით დღეს, 14 მარტს გამოვლენილი კორონავირუსით ინფიცირებული 5 პირი თვითიზოლაციაში იმყოფებოდა და პერიოდულად ხდებოდა მათი შემოწმება. მისი განმარტებით, სავარაუდოდ, აღნიშნულ პირებს კონტაქტი ჰქონდათ იტალიიდან ჩამოსულ ერთ-ერთ ინფიცირებულთან:
“ხუთივე პირი თვითიზოლაციაში იმყოფებოდა და მათზე მიმდინარეობდა მეთვალყურეობა. როდესაც გამოვლინდათ კორონავირუსის ნიშნები, ჩაუტარდათ სამედიცინო ტესტირება”, – განმარტა ეზუგბაიამ.
ეზუგბაიას თქმით აღნიშნული 5 პაციენტის მდგომარეობა დამაკმაყოფილებელია.
საქართველოში 14 მარტის საღამოს მონაცემებით, დადასტურებულია კორონავირუსის 30 შემთხვევა. კარანტინის რეჟიმში იმყოფება 418 ადამიანი, ხოლო სტაციონარში მეთვალყურეობის ქვეშ 54.
