მინიმუმ 33 თურქი სამხედრო დაიღუპა სირიაში, იდლიბის პროვინციაში ბაშარ ასადის ერთგული ძალების ავიაიერიშის შემდეგ, აცხადებს თურქეთის ჰათაის პროვინციის გუბერნატორი რაჰმი დოგაი. ინფორმაციას ამის შესახებ CNN ავრცელებს.
გარდა ამისა, დოგანის განცხადებით, იერიშის შედეგად დაშავბულია 35 სამხედრო, რომლებიც თურქეთის ტერიტორიაზე, საავადმყოფოში გადაიყვანეს.
თურქეთის კომუნიკაციების დირექტორის, ფაჰრეთინ ალთუნის თქმით, მომხდარის გამო პრეზიდენტის სასახლეში რეჯეფ თაიფ ერდოღანი უშიშროების საბჭოს სხდომას ატარებს. ამასთან ერთად, მისი თქმით, თურქეთი საპასუხო ზომების მიღებას გეგმავს.
თურქეთის საგარეო საქმეთა სამინისტროს განცხადებით, მინისტრი მევლუთ ჩავუშოღლუ NATO-ს გენერალურ მდივანს, იენს სტოლტენბერგს ესაუბრა. საუბრის დეტალები ამჟამად ცნობილი არ არის.
გარდა ამისა, აშშ-ის სახელმწიფო დეპარტამენტის პრეს-სპიკერის განცხადებით აშშ „ძალიან შეშფოთებულია“ მომხდარის გამო. „კონტაქტში ვარ თურქეთის ხელისუფლებასთან, რათა დავადასტუროთ ბოლოდროინდელი მოვლენები და გქვონდეს უფრო მეტი ინფორმაცია, თუ რა ხდება [იდლიბში]“. „ჩვენ გვერდით ვუდგავართ ჩვენ მოკავშირეს, თურქეთის და მოვუწოდებთ, რომ დასრულდეს ეს საზიზღარი იერიში ასადის რეჟიმისა და რუსეთ-ირანის მხარდაჭერილი ძალების მიერ“.
Reuters აგრეთვე აღნიშნავს, რომ თურქეთის ოფიციალური პირის თქმით, ანკარა აღარ შეუშლის ხელს სირიელი ლტოლვილების მოძრაობას ევროპისკენ.
