პრეზიდენტმა სალომე ზურაბიშვილმა იუნკრების შეურაცხყოფად შეაფასა პარლამენტში სსრკ-ის ჰიმნის ჩართვა.
18 თებერვალს პარლამენტოს პლენარულ სხდომაზე არჩილ თალაკვაძის გამოსვლის დროს ოპოზიციონერმა პოლიტიკოსებმა, ელენე ხოშტარიამ და ირმა ნადირაშვილმა სსრკ-ის ჰიმნი ჩართეს. ამ სიმბოლური პერფორმანსით მათ საპარლამენტო უმრავლესობა გააკრიტიკეს.
23 თებერვალს, როდესაც საქართველოში 1921 წელს რუსეთის არმიის წინააღმდეგ კოჯორ-ტაბახმელასთან ბრძოლაში დაღუპულ იუნკრების დღეს აღნიშნავენ, პრეზიდენტმა ზურაბიშვილმა განაცხადა:
„ვიღაცამ გაბედა და ამ ადგილას გააჟღერა საბჭოთა ჰიმნი. ეს არის ამათი [იუნკრების] შეურაცხყოფა. ყველაფერი შეიძლება, ყველანაირი კრიტიკა, ყველანაირი დაცინვა, მაგრამ რაღაცები არ შეიძლება“.
ამ პერფორმანსის გამო ელენე ხოშტარიას ოპონენტებმა აქციები მოუწყვეს. აქციები გაიმართა მისი პარტიის, „ევროპული საქართველოს“ ოფისთანაც, სადაც ხოშტარიას მანდატის დატოვება მოსთხოვეს.