ნეტგაზეთი | 2019 წელს ნარკოდანაშაული 51%-ით გაიზარდა – IDFI 2019 წელს ნარკოდანაშაული 51%-ით გაიზარდა – IDFI – Netgazeti

2019 წელს ნარკოდანაშაული 51%-ით გაიზარდა – IDFI

კვლევითი ორგანიზაცია „ინფორმაციის თავისუფლების განვითარების ინსტიტუტი“ (IDFI), რომელმაც 2019 წლის რეგისტრირებული დანაშაულის სტატისტიკა გააანალიზა, აცხადებს, რომ ოფიციალურად რეგისტრირებული ნარკოდანაშაულის რიცხვმა მოიმატა.

კერძოდ, ნარკოტიკულ დანაშაულთა რიცხვი წინა წელთან შედარებით დაახლოებით 51%-ით არის გაზრდილი: 2018 წელს დაფიქსირდა 4239 ფაქტი, 2019 წელს კი -6415.

IDFI-ის ანალიზის თანახმად, ეს უმეტესწილად განაპირობა ნარკოტიკული ნივთიერებების განმეორებითი მოხმარების 1056 შემთხვევით მატებამ.

წყარო: IDFI

ამის გარდა, ორგანიზაციის თანახმად, წინა წელთან შედარებით 108%-ით არის გაზრდილი ნარკოტიკების შემცველ მცენარეთა უკანონო დათესვის მუხლით გათვალისწინებული დანაშაული.

„24%-ით არის გაზრდილი ნარკოტიკების შეძენა, შენახვა ან გასაღების მუხლით რეგისტრირებული დანაშაული. ამ კატეგორიის დანაშაულების მატება გარკვეულწილად შესაძლებელია, წინა წელთან შედარებით ნარკოპოლიტიკის გამკაცრებას უკავშირდებოდეს“, – წერია 13 თებერვალს გამოქვეყნებულ ანგარიშში.

წაიკითხეთ ასევე:

რატომ გაიზარდა ნარკოტიკების მოხმარების სტატისტიკა?

საერთაშორისო უფლებადამცველი ორგანიზაცია Human Rights Watch-ის ერთ-ერთ ბოლო ანგარიშში, რომელიც 2020 წლის 15 იანვარს გამოქვეყნდა, წერია, რომ საქართველოს ხელისუფლება მკაცრ ანტინარკოტიკულ კანონმდებლობას ინარჩუნებს.

„ხელისუფლებამ მკაცრი ანტინარკოტიკული კანონმდებლობა შეინარჩუნა, რომლითაც ადამიანებს ნარკოტიკული ნივთიერების (მარიხუანის გარდა) მოხმარების ან პირადი მოხმარების მიზნით შეძენა/შენახვისთვის სჯიან“, – წერს ორგანიზაცია.

საქართველოს კანონმდებლობით, ნარკოტიკული დანაშაულები ხშირად ხანგრძლივი პატიმრობით, უზარმაზარი ჯარიმებით და უფლებების შეზღუდვით, მათ შორის სატრანსპორტო საშუალების მართვის ან სხვადასხვა ტიპის საქმიანობის განხორციელების უფლების ჩამორთმევით ისჯება.

HRW-ის თანახმადვე, საკანონმდებლო რეფორმის პროექტი, რომლითაც ნარკოტიკის მოხმარებისადმი საზოგადოებრივ ჯანმრთელობაზე ორიენტირებული მიდგომები დაინერგებოდა და სადამსჯელო პრაქტიკა შეიცვლებოდა, კვლავ განუხილავია.

სხვა მაჩვენებლები

სამინისტროს მონაცემებზე დაყრდნობით IDFI წერს, რომ 2019 წლის განმავლობაში, წინა წელთან შედარებით, გარკვეულწილად შემცირდა სატრანსპორტო დანაშაული (-6,09%), სამოხელეო დანაშაული (-1,55%), მოსახლეობის ჯანმრთელობისა და საზოგადოებრივი ზნეობის წინააღდეგ ჩადენილი დანაშაული (-15,14%). სხვა რეგისტრირებულ დანაშაულთა ჯგუფების ზრდის მაჩვენებელი 1.55%-დან 51%-მდე მერყეობს.

ამასთან, „2019 წლის განმავლობაში წინა წელთან შედარებით 9,19%-ით გაუარესდა სიცოცხლის წინააღმდეგ ჩადენილ დანაშაულთა ჯგუფში გაერთიანებული დანაშაულების მაჩვენებელი. აღსანიშნავია ის ფაქტი, რომ განზრახ მკვლელობების რიცხვი 49%-ით (37 შემთხვევით ნაკლები) შემცირდა, თუმცა, ამავდროულად, დამამძიმებელ გარემოებებში ჩადენილი განზრახ მკვლელობების რიცხვი 56%-ით (14 შემთხვევით მეტი) გაიზარდა. ამასთან, 31,7%-ით (+13 შემთხვევით) გაიზარდა მკვლელობის მცდელობის მაჩვენებელი.

საკუთრების წინააღდეგ ჩადენილი დანაშაულების რიცხვი 2019 წელს 2%-ით (516 შემთხვევით) არის გაზრდილი, რაც ძირითადად ქურდობის მაჩვენებლის 358 შემთხვევით მატებით არის განპირობებული. ქურდობის მაჩვენებლის ზრდის ფონზე აღსანიშნავია ყაჩაღობის შემთხვევების 19,8%-ით (53 შემთხვევით ნაკლები) კლება.

ცალკეული დანაშაულების რეგისტრირებული მაჩვენებლის ზრდის თვალსაზრისით ასევე აღსანიშნავია გაუპატიურება (+24%, +23 შემთხვევა), ,ცივი იარაღის ტარება (+31,5% +119 შემთხვევა), მუქარა (+23,12%, +413 შემთხვევა), სასამართლო აქტების აღსრულების წინააღმდეგ ჩადენილი დანაშაული( + 55,39%, + 534 შემთხვევა), ყალბი დოკუმენტების დამზადება(+25,2%, +449 შემთხვევა), კომპიუტერული დანაშაული (+42,43%,+538 შემთხვევა) და სხვა“.

წყარო: IDFI/შსს

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com