ტრამპმა პელოსის ხელი არ ჩამოართვა, პელოსიმ მისი მიმართვის ასლი დახია

2020 წლის 4 თებერვალს პრეზიდენტმა დონალდ ტრამპმა აშშ-ის კონგრესს – სენატსა და წარმომადგენელთა პალატას „კავშირის მდგომარეობაზე“ (State of the Union), ანუ, ქვეყნის მდგომარეობის შესახებ სიტყვით მიმართა.

თავის გამოსვლაში ტრამპმა სხვადასხვა საკითხის შესახებ ისაუბრა – აბორტზე, ეკონომიკაზე, მაგრამ თავი შეიკავა იმპიჩმენტის ხსენებაზე. იმპიჩმენტის პროცესი აშშ-ში ხუთშაბათს დასრულდება და დიდი ალბათობით სენატი ტრამპს გაამართლებს.

მიმართვის შემდეგ თეთრმა სახლმა ნენსი პელოსი გააკრიტიკა ტრამპის გამოსვლის ტექსტის დახევისთვის, ხოლო თავად პელოსიმ „ტვიტერში“ დაწერა, რომ „დემოკრატები არასდროს შეწყვეტენ მეგობრობის ხელის გაწვდენას ხალხის კეთილდღეობისთვის. ვიმუშავებთ სხვებთან, სადაც კი შეგვიძლია, მაგრამ ბოლომდე ვიდგებით, სადაც არ შეგვეძლება“, – დაწერა პელოსიმ.

თუმცა ყველაზე დიდი ყურადღება მიიქცია არა ტრამპის გამოსვლამ, არამედ მის დაწყებამდე და შემდეგ მომხდარმა მოვლენებმა– გამოსვლის დაწყებამდე ტრამპმა წარმომადგენელთა პალატის სპიკერს ხელი არ ჩამოართვა, ხოლო პელოსიმ გამოსვლის შემდეგ ტრამპის მიმართვის ტექსტი დახია.

პელოსი ხევს ტრამპის გამოსვლის ასლს. ფოტო: EPA

დონალდ ტრამპი და ნენსი პელოსი

ტრამპი ხელს არ ართმევს პელოსის.

დონალდ ტრამპისა და ნენსი პელოსის ურთიერთობები განსაკუთრებული სითბოთი არ გამოირჩევა. პელოსის თქმით, მას და ტრამპს ურთიერთობა ოქტომბრის შემდეგ არ ჰქონიათ – ზუსტად მაშინ წარმომადგენელთა პალატაში (რომლის სპიკერიცაა პელოსი) ტრამპის იმპიჩმენტი დაიწყო, რომელიც, საბოლოო ჯამში, ტრამპის გამტყუნებით და საქმის სენატში გადაგზავნით დასრულდა.

ტრამპისა და პელოსის ურთიერთობა მედიისა და სოცქსელების ყურადღების ცენტრში 2019 წელს „კავშირის მდგომარეობაზე“ მაშინდელი გამოსვლისასაც აღმოჩნდა. მაშინ პელოსის მიერ „უცნაურად“ დაკრულმა ტაშმა მიიქცია ყურადღება.

პელოსის „უცნაური“ ტაში ტრამპს

პელოსის „უცნაური“ ტაში ტრამპს


გარეკანის ფოტო: EPA

ნეტგაზეთის მასალების სხვა გამოცემებში გადაბეჭდვის წესი
ავტორი
ნიკა ბურდული – ნეტგაზეთის რეპორტიორი 2019 წლის დეკემბრიდან. E-mail: burrrduli@gmail.com / მობ.: +995 597 14 88 31