ნეტგაზეთი | უარვყოფთ ენმ-ს უსაფუძვლო და პოლიტიკურად მოტივირებულ ბრალდებებს – სუს უარვყოფთ ენმ-ს უსაფუძვლო და პოლიტიკურად მოტივირებულ ბრალდებებს – სუს – Netgazeti
RU | GE  

უარვყოფთ ენმ-ს უსაფუძვლო და პოლიტიკურად მოტივირებულ ბრალდებებს – სუს

სახელმწიფო უსაფრთხოების სამსახურში (სუს) თვალთვალთან დაკავირებით პოლიციელი გიორგი დვალიშვილის განცხადებებას უარყოფენ. სუს-ში აცხადებენ, რომ მსგავსი “პოლიტიკურად მოტივირებული” ბრალდებების მიზანი უწყების დისკრედიტაციაა.

“სახელმწიფო უსაფრთხოების სამსახური კატეგორიულად უარყოფს “ერთიანი ნაციონალური მოძრაობის” სრულიად უსაფუძვლო და პოლიტიკურად მოტივირებულ ბრალდებებს. აღსანიშნავია, რომ სხვადასხვა დროს კონკრეტული პოლიტიკური ძალებისა და მათი აქტივისტების მიერ სახელმწიფო უსაფრთხოების სამსახურის მისამართით გავრცელებული მსგავსი ბრალდებები არ ეფუძნება ფაქტებსა და მტკიცებულებებს და მხოლოდ უწყების დისკრედიტაციას და პოლიტიკურ მიზნებს ემსახურება,”-წერია სუს-ის განცხადებაში.

პოლიციელი გიორგი დვალიშვილი ამბობს, რომ მის ოჯახს უთვალთვალებენ. დღეს, 26 იანვარს სახელმწიფო უსაფრთხოების სამსახურის (სუს) შენობის წინ ენმ-ს ერთ-ერთ ლიდერთან ხატია დეკანოიძესთან ერთად გამართულ ბრიფინგზე, მან სუს-ის უფროს გრიგოლ ლილუაშვილს მოუწოდა მისი ოჯახის თვათვალი შეწყვიტოს.

“მინდა ბატონ გრიგოლ ლილუაშვილს მივმართო. დაანებეთ თავი  ჩემს ოჯახზე თვალთვალს. ჩემი თვალთვალი პრობლემა არ არის.. დასამალი არაფერი მაქვს. მზად ვარ, ახლაც შევიდე და ნებისმიერ კითხვას ვუპასუხო თუ რამე აინტერესებთ. პოლიციელი ვარ და ჩემგან მტრის ხატს ნუ ქმნიან. რაც შეეხება ჩემს ოჯახს, მყავს სამი არასრულწლოვანი ბავშვი, რომლებიც სისტემატიურად  ზეწოლის ქვეშ იმყოფებიან.. მათი თვალთვალი უკვე ძალიან ზედმეტია. [ბავშვები] ფსიქოლოგიურად უდიდესი წნეხის ქვეშ არიან. აქედან გამომდინარე, კიდევ ერთხელ მივმართავ შეწყდეს ეს უკანონობა,”-აცხადებს დვალიშვილი. დვალიშვილის ოჯახზე ზეწოლასა და უკანონო თვალთვალზე ისაუბრა ხატია დეკანოიძემაც.

პოლიციელი გიორგი დვალიშვილი, რომელიც “მთავარი არხის” მიერ გავრცელებულ ვიდეოში ფიგურირებს, ამბობს, რომ ლევან იზორიას ძმასთან, ვახტანგ იზორიასთან ინციდენტი 10-ლარიანი დარღვევის გამო დაიწყო. ტელეკომპანია “მთავარმა არხმა” 23 იანვარს გაავრცელა ვიდეო, რომელზეც აღბეჭდილია, როგორ აკავებს პატრული თავდაცვის ყოფილი მინისტრის, ლევან იზორიას ძმას, რომელსაც მალევე, “ჩარევის” შედეგად ათავისუფლებენ. პოლიციელი, რომელმაც მაღალჩინოსნის ძმა დააკავა, კადრების განყოფილებაშია გადაყვანილი და ამ თემაზე პირველად ახლა ისაუბრა.

ვიდეოკადრები 2014 წელსაა გადაღებული, როდესაც იზორია შინაგან საქმეთა მინისტრის მოადგილე იყო. კადრებში ჩანს, როგორ ემუქრება დაკავებული იზორია მანქანაში პოლიციელს, რომელმაც დააკავა. ამის შემდეგ საპატრულო მანქანასთან მიდიან ლევან იზორიას მძღოლი და სხვა პოლიციელები, რომლებიც იზორიას, მინისტრის მოადგილის ძმას ათავისუფლებენ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.