ევროპარლამენტარები “ქართულ ოცნებას” აკრიტიკებენ

ევროპარლამენტის წევრები საქართველოს ხელისუფლებას აკრიტიკებენ პროპორციულ საარჩევნო სისტემაზე გადასვლის დაპირების ჩაგდებისა და ოპონენტების დევნის გამო.

ევროპარლამენტის საგარეო ურთიერთობათა კომიტეტში მოსმენა გაიმართა საქართველოში არსებულ სიტუაციასთან დაკავშირებით, რომელშიც პარლამენტის ვიცესპიკერმა კახა კუჭავამ და შერიგებისა და სამოქალაქო ინტეგრაციის საკითხებში სახელმწიფო მინისტრმა ქეთევან ციხელაშვილმა მიიღეს მონაწილეობა.

ევროპარლამენტის წევრმა სოციალისტებისა და დემოკრატების პროგრესული ალიანსიდან რაფაელ გლუქსმანმა სრული მხარდაჭერა გამოუცხადა საქართველოს ევროპასთან სწრაფვისა და რუსული ოკუპაციის საკითხებში. ამავდროულად, ისაუბრა საქართველოს ხელისუფლების მიერ ოპონენტების პოლიტიკურ დევნაზე, როდესაც კი მთავრობას კრიზისი ეწყება.

“ჩემი შეკითხვა შეეხება დროში უცნაურ დამთხვევას ოპოზიციის წევრების მიმართ სამართლებრივი დევნის დაწყების თაობაზე.  ვგულისხმობ, რომ თქვენ გაქვთ კრიზისი და ამ დროს ბატონი მელიას, ბატონი ბოკერიას და ოპოზიციის ბევრი ლიდერის წინააღმდეგ იწყება ხელახალი გამოძიება და მათ იბარებენ პროკურატურაში. ჩემი კითხვა ასევე შეეხება მედიის მდგომარეობას. ყველამ ვიცით ეპიზოდი “რუსთავი 2″-თან დაკავშირებით. როგორც კი ნიკა გვარამიამ, რომელიც წარსულში ხელძღვანელობდა ამ არხს, ახალი ტელევიზიის გახსნა დააანონსა, მის წინააღმდეგ კვლავ დაიწყო გამოძიება. ამიტომ, რა თქმა უნდა, გვაქვს სერიოზული კითხვები იმასთან დაკავშირებით, რომ გამოძიებას იწყებთ, როცა პოლიტიკური პრობლემები გაქვთ”, – განაცხადა გლუქსმანმა.

ევროპელი მწვანეებისა და თავისუფალი ალიანსის ჯგუფის წარმომადგენელმა მარკეტა გრეგოროვამ კითხვით მიმართა კახა კუჭავას:

“მე ვიყავი საქართველოში და ველაპარაკე ყველა მხარეს: პროსახელისუფლებო, არასამთავრობო ორგანიზაციებს და თავად დემონსტრანტებსაც. მე არ მაქვს ინფორმაცია მათ მიერ პარლამენტის შესასვლელების დაბლოკვის შესახებ. პარლამენტი დაიკეტა თბილისის ცნობილი კედლით, თუმცა ეს მხოლოდ რეპლიკაა. მინდა გკითხოთ: როდესაც თქვენ საუბრობთ ევროპასთან და ევროკავშირთან სიახლოვეზე და ამბობთ, რომ ახლა ყველაზე ახლოს ხართ, ვიდრე ოდესმე, ფიქრობთ, რომ პოლიტიკური პატიმრები თქვენს ქვეყანაში, დაგეთანხმებიან?”.

ევროპარლამენტის დეპუტატებმა საქართველოს ხელისუფლება კიდევ ერთხელ გააკრიტიკეს პროპორციულ საარჩევნო სისტემასთან გადასვლის შესახებ შეუსრულებელი დაპირების გამო.

“თქვენი ევროპული ორიენტაციისადმი სულ იქნება უპირობო მხარდაჭერა, მაგრამ ამას თან უნდა მოსდევდეს თქვენი პირობების შესრულება. ვფიქრობ, რომ მცდელობაა, შემოგვაპაროთ საარჩევნო კანონის ცვლილების ჩავარდნა მაღალი შიდაპარტიული დემოკრატიის მიზეზით. „ქართულ ოცნებაში“ იყვნენ პარლამენტის წევრები, რომლებმაც თქვენი პარტია დატოვეს. გულახდილი რომ იყოთ, ხომ არ ყოფილა ისე, რომ ბატონი ივანიშვილი საჯაროდ აცხადებდა, რომ ცვლილება სურდა, თუმცა ფარდის უკან ისე აკეთებდა, რომ ცვლილებები ჩავარდნილიყო – ცხადია, ძალაუფლების შენარჩუნების სურვილის გამო. თუ ევროპელი ხართ, გთხოვთ, აღიარეთ, რომ საქმე ასე იყო”, – განაცხადა ევროპის სახალხო პარტიის წარმომადგენელმა მიხაელ გალერმა.

არჩევნების თემას შეეხო საკუთარ გამოსვლაში ევროპარლამენტის წევრი და ლიტვის ყოფილი პრემიერ-მინისტრი ანდრიუს კუბილიუსიც.

“როდესაც ევრონესტის სესია გვქონდა, მე, როგორც ევრონესტის საპარლამენტო ასამბლეის ხელმძღვანელმა,  არაერთი შეხვედრა გავმართე როგორც ოპოზიციასთან, ისე  მმართველ პარტიასთან, მათ შორის პარლამენტის თავმჯდომარესთან  და პარტიის ლიდერთან. გთხოვთ, მიიტანოთ ჩემი მარტივი გზავნილი თქვენი პარტიის ლიდერებამდე: ისინი დამპირდნენ, რომ დიალოგი შედეგს მოიტანდა, არჩევნებში პროპორციული ელემენტის შეტანის სახით. კვლავ ველოდები, როდის დადგება ეს შედეგი. ამ შედეგის გარეშე საერთაშორისო ნდობა თქვენი არჩევნებისადმი ძალიან ლიმიტირებული იქნება”, – განაცხადა კუბლიუსმა და დასძინა: “ასევე, შეგიძლიათ დამისახელოთ, არის თუ არა რომელიმე ოპოზიციური ლიდერი საქართველოში, რომელიც მთავარ პროკურორთან არ არის ახლა დაპატიჟებული?”

ევროპის სახალხო პარტიის წარმომადგენელმა სანდრა კალნიეტემ საქართველოში დემოკრატიის რისკების შესახებ ისაუბრა.

“თქვენ ახსენეთ, რომ ქართველების მიერ ევროპული ინტეგრაციის მხარდაჭერა იზრდება, მაგრამ აზრის იმავე გამოკითხვაში ვხედავთ, რომ ქართველი ხალხი ფიქრობს, რომ დემოკრატია მათ ქვეყანაში რისკის ქვეშ იყო და ეს ძალიან შემაწუხებელია, რადგანაც ევროკომისია და ევროპარლამენტი ყოველთვის დიდი მხარდაჭერით და დიდი თანაგრძნობით იყვნენ განწყობილი საქართველოს მიმართ. შევადაროთ უკრაინა, რომლის ტერიტორიაზეც ომი მიდის და შეუპოვრად ატარებს დემოკრატიულ რეფორმებს, და ის ფაქტი, რომ ვერ შეძელით, შეგესრულებინათ პროპორციულ საარჩევნო სისტემაზე გადასვლა, ვერაფერ კარგს ვერ მიგვანიშნებს ქართულ დემოკრატიაზე. ხოლო „ქართული ოცნების“ თავმჯდომარის, ივანიშვილის ახლანდელი განცხადება, რომ ოპოზიიცის ბევრი ლიდერი მომავალში ციხეში მოხვდება, ძალიან რთულია მისაღებად. ის ფაქტი, რომ “ევროპული საქართველოს” წევრის, გიგა ბოკერიას წინააღმდეგ საქმე განახლდა ხუთწლიანი სიჩუმის შემდეგ , ძალიან სიმბოლურია”, – განაცხადა მან.

ესტონელმა ევროპარლამენტარმა სვენ მიკსერმა  საქართველოს წარმომადგენლებს დაუსვა კითხვები პროპორციული საარჩევნო სისტემის ჩაგდებით გამოწვეული პოლიტიკური ჩიხიდან გამოსავლის შესახებ.
“საშინაო სიტუაციას რაც შეეხება: ნათელია, ის, ვინც საკონსტიტუციო ცვლილებებისა და პროპორციულ არჩევნებზე 2024 წლისთვის გადასვლის გადაწყვეტილება მიიღო, ხელისუფლება და მმართველი პარტია იყო. ამავე დროს მართალია ისიც, რომ გასული ზაფხულის საპროტესტო დემონსტრაციების შემდეგ ამ თარიღის გადმოწევის პირობა [რომ 2020 წელსვე ჩატარებულიყო პროპორციული არჩევნები] არ შესრულდა. ვფიქრობ, რომ ევროკავშირის დელეგაცია თბილისში ამ ჩიხიდან გამოსავლის საპოვნელად დიალოგის უზრუნველყოფას ცდილობს მმართველ პარტიასა და ოპოზიციას შორის. გასაგებია, რომ არსებობს საკონსტიტუციო და სამართლებრივი აქცენტები. მაგრამ მე მსურს გავიგო თქვენი შეხედულებები შესაძლო კომპრომისზე, რადგან მე ვგრძნობ, რომ ნებისმიერი კომპრომისი გარდაუვლად იქნება ნაწილობრივ პოლიტიკური. შესაბამისად, როგორ ხედავთ ამ პოლიტიკური ჩიხის გარღვევის შესაძლებლობას? ვფიქრობ, პოლიტიკური ველის ეს უკიდურესი პოლარიზაცია დასანანია, მაგრამ ეს არ არის უნაკალური საქართველოსთვის“, – განაცხადა მიკსერმა.

“საბედნიეროდ, ვფიქრობ, რომ ქართული საზოგადოება ძალიან ფხიზელია და ესმის ეს სიტუაცია ისევე, როგორც თქვენ. სწორედ აქედან გამომდინარე, ის, რამაც საპროტესტო დემონსტრაციების მთელი წყება გამოიწვია, იყო ნების დართვა მოსკოვის იდეოლოგებისთვის, ესაუბრათ საქართველოს პარლამენტიდან“, – განაცხადა, თავის მხრივ, ევროპარლამენტის უსაფრთხოებისა და თავდაცვის ქვეკომიტეტის (SEDE) თავმჯდომარე ანა ფოტიგამ და საქართველოს წარმომადგენლებს დაუსვა კითხვა ივნისის შემდეგ საპროტესტო დემონსტრაციებისას დაკავებულთა რაოდენობის შესახებ.

ევროპარლამენტის წევრების გამოსვლებს პარლამენტის ვიცესპიკერმა უპასუხა. კახა კუჭავას აზრით, დეპუტატების კითხვებმა ცხადყვეს, რომ ზოგიერთ შემთხვევაში მათ არასწორი ინფორმაცია მიაწოდეს.

“კითხვები, რომელიც დასმული იქნა, აჩევნებს, რომ ზოგიერთ შემთხვევაში  შეცდომაში შემყვანი ინფორმაცია არის თქვენთვის მოწოდებული, რომელზეც სიამოვნებით გაგიზიარებთ ფაქტებს და არა მხოლოდ ჩემს მოსაზრებას. მოლაპარაკებები [ოპოზიციასთან] მიმდინარეობს, წარმოდგენილი იყო ხედვა საარჩევნო სისტემასთან დაკავშირებით, რომელიც არაკონსტიტუციურად იყო მიჩნეული. ჩვენი ხედვებიც წარმოვადგინეთ და მათ პასუხს ველოდებით. კონსენსუსი ნიშნავს, რომ ორივე მხარე უნდა მივიდეს შეთანხმებამდე და დასთანხმდეს გარკვეულ პრინციპებს. არასწორია ინფორმაცია ათეულობით ათასი ადამიანის პროტესტის შესახებ. თავდაპირველად იყვნენ ახალგაზრდები, რომლებიც გამოვიდნენ ქუჩებში, როდესაც ნახეს რუსი დეპუტატი საქართველოს პარლამენტის თავმჯდომარის სკამში, მაგრამ შემდეგ ჩვენ ვნახეთ ოპოზიციური ლიდერების მცდელობა, პარლამენტის შენობაზე შეტევა განეხორციელებინათ. ბევრი რამე ითქვა და საკმარისი დრო არ მაქვს პასუხების გასაცემად, მაგრამ ნებისმიერ ფორმატს გამოვიყენებ, რომ წარმოგიდგინოთ მტკიცებულებები, რომლითაც ჩვენი პოზიციები გამყარებულია”, – განაცხადა კახა კუჭავამ.

ნეტგაზეთის მასალების სხვა გამოცემებში გადაბეჭდვის წესი
ავტორი