“მოდით, ფინალს დაველოდოთ” – გახარია პოსტის შესაძლო დატოვებაზე

“მოდით, ფინალს დაველოდოთ. ნუ ჩქარობთ, დაველოდოთ ფინალს და ვნახავთ”, – ასე უპასუხა პრემიერ-მინისტრმა გიორგი გახარიამ ჟურნალისტების შეკითხვას, ტოვებს თუ არა დაკავებულ თანამდებობას.

გახარიამ ამ საკითხზე დამატებითი კომენტარი არ გააკეთა.

“თქვენ ისე დაჟინებით მეკითხებით, გინდათ, დაგასპოილეროთ? დაელოდეთ ფინალურ სერიას”, – უთხრა შემდეგ გახარიამ ჟურნალისტებს.

ტელეკომპანია “პირველის” ინფორმაციით, იგეგმება სამთავრობო ცვლილებები, რომლის შედეგადაც, თანამდებობას დატოვებს პრემიერ-მინისტრი გიორგი გახარია.

“პირველმა” ამის შესახებ კითხვა დაუსვა ინფრასტრუქტურის მინისტრ მაია ცქიტიშვილს, რაზეც მან თქვა, რომ ეს არის “არაადეკვატური კითხვა”.  აღნიშნული ინფორმაცია უარყო საგარეო საქმეთა მინისტრმა დავით ზალკალიანმაც.

რაც შეეხება ეკონომიკის მინისტრ ნათია თურნავას, მან ჟურნალისტის კითხვას ასე უპასუხა:

“ჰა, ჰა, ჰა… თქვენ ტვ “პირველი” ბრძანდებით. მე მგონი, თქვენი ტელევიზია იყო, 3-4 თვის წინ გადამდგარად რომ მაცხადებდა. როგორი სიმართლეც გამოდგა ის, ისეთივე სიმართლე არის ის, რასაც თქვენ საუბრობთ. არასერიოზულია”.

გიორგი გახარიას 2019 წლის სექტემბრამდე შინაგან საქმეთა მინისტრის პოზიცია ეკავა. სამოქალაქო აქტივისტები და ოპოზიცია მის გადადგომას ითხოვდნენ 20-21 ივნისის აქციის დარბევის გამო, თუმცა 8 სექტემბერს პრემიერ-მინისტრად დანიშნეს.

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com