2 წლის ანიტა ფაცაციას მკურნალობის ხარჯებს ინდოელი ბიზნესმენი ს. იაგატრაკშაკანი დააფინანსებს. ამის შესახებ ინფორმაციას ანიტას დედა მარიკო სადრაძე ავრცელებს.
მისი განცხადებით, ინდოელი ბიზნესმენი ანიტას მდგომარეობით ჯერ კიდევ 2 წლის მოზარდის ინდოეთში ჩაფრენისას დაინტერესდა, მას შემდეგ კი ხშირად სტუმრობდა ანიტას. სადრაძის ინფორმაციით, იაგატრაკშაკანის კომპანიის წარმომადგენლები ანიტას ოჯახს გუშინ, 7 იანვარს, საავადმყოფოში ესტუმრნენ და აცნობეს, რომ მკურნალობის ხარჯების დაფარვაში დაეხმარებოდნენ.
“ეს იმდენად დიდი სასწაული იყო ჩვენთვის, რომ დაბნეულობისგან მადლობის თქმაც კი ძლივს მოვახერხეთ”, – ამბობს ანიტას დედა.
მისივე ინფორმაციით, ინდოელი ექმიების გადაწყვეტილებით, ანიტას თერაპიული კურსი უნდა ჩაუტარდეს, რომლის წარმატებით ჩატარების შემთხვევაში, 2 წლის მოზარდს გულის გადანერგვის ოპერაცია აღარ დასჭირდება.
ბოლო რამდენიმე თვეა ანიტა ფაცაცია დილატაციურ კარდიომიოპათიას ებრძვის. ის ინდოეთში სპეციალური რეანო-თვითმფრინავით გადაიყვანეს. დიაგნოზის შედეგად მოზარდს გულის გადანერგვა ესაჭიროება, რაც სხვადასხვა პრობლემასთან არის დაკავშირებული.