ივანიშვილის დავალებით მეჩალიჩებოდნენ, პატრიარქი გადავაყენოთ და შიო დავაყენოთო – მეუფე იაკობი

საქართველოს მართლმადიდებელი ეკლესიის პატრიარქის ქორეპისკოპოსი იაკობი აცხადებს, რომ ყოფილი პრემიერ-მინისტრი გიორგი კვირიკაშვილი, სუს-ის უფროსი ვახტანგ გომელაური და იმდროინდელი ეკონომიკის მინისტრი გიორგი გახარია მას პატრიარქის გადაყენებაში დახმარებას სთხოვდნენ. ამის შესახებ მან ტვ “პირველის” ეთერში დღეს ისაუბრა.

როგორც პატრიარქის ქორეპისკოპოსი ირწმუნება, შეხვედრა გიორგი კვირიკაშვილის კაბინეტში, მთავრობის კანცელარიაში გაიმართა და მას სწორედ კვირიკაშვილი, გომელაური და გახარია ესწრებოდნენ. ქორეპისკოპოსს არ დაუკონკრეტებია შეხვედრის გამართვის კონკრეტული თარიღი.

“მე დამიძახეს კვირიკაშვილის დროს. ყველაზე წესიერი კაცი იყო ვახო გომელაური. კვირიკაშვილი, ვახო [გომელაური] და გიორგი გახარია მეჩალიჩებოდნენ იმაზე, რომ პატრიარქი გვინდა გადავაყენოთ და შიო [მუჯირი, პატრიარქის მოსაყდრე] დავაყენოთ პატრიარქადო. მე ვუთხარი, ბიჭო თქვენ ვინ გეკითხებათ მაგას, ეკლესიამ თვითონ იცის და ცოცხალი პატრიარქის წინააღმდეგ როგორ მიდიხართ-თქო”, – თქვა ქორეპისკოპოსმა იაკობმა. მისი თქმით, ამის შესახებ ინფორმირებულია ილია მეორეც.

სასულიერო პირის თქმით, პატრიარქ ილია მეორის გადაყენების შესახებ ბიზნესმენი ვანო ჩხრტიშვილი ესაუბრა ბიძინა ივანიშვილს, რომელმაც შემდეგ ზემოაღნიშნულ თანამდებობის პირებს დაავალა ამის განხორციერლება.

როგორც მეუფე იაკობი ირწმუნება, თანამდებობის პირებმა მისგან დახმარება იმიტომ ითხოვეს, რომ ის არის საპატრიარქოში გავლენიანი სასულიერო პირი.

“დღევანდელ ხელისუფლებაზე ყველანაირი დოკუმენტი მაქვს. ეს ხელისუფლება არის კანაფის ხელისუფლება…

პატრიარქის მკვლელობა ვისაც უნდოდა, იმ ხალხს არ ვაპატიებ არაფერს. არც მეუფე თეოდორე ვიცი, არც მეუფე შიო. ისინი არ არიან ჩარეული. სხვა მეუფეები ზოგი ზღვაზე ნებივრობს, ზოგიც სხვაგან, მაგათ პირდაპირ დავარტყამ”, – ამბობს მეუფე იაკობი.

ის ასევე აცხადებს, რომ ყოფილი პროკურორები – ირაკლი შოთაძე და ოთარ ფარცხალაძე – მას ფულს სძალავდნენ და ამის შესახებ ინფორმირებული იყო გიორგი კვირიკაშვილი. თუმცა მეუფე იაკობს ამ შემთხვევის დეტალები არ უხსენებია.

როგორც ქორეპისკოპოსი ირწმუნება, ციანიდის საქმე წინასწარ იყო დაგეგმილი და მისი მიზანი პატრიარქის მკვლელობა იყო, ხოლმე მის დაგეგმვაში დეკანოზ მამალაძესთან ერთად ჩართულები იყვნენ მეუფე პეტრე, ასევე თანამდებობის პირები, ხოლო თავად მამალაძე ამ საქმისთვის “მეუფე დიმიტრიმ და სოსომ [სავარაუდოდ, პატრიარქის დაცვის უფროსი სოსო ოხანაშვილი] შეარჩიეს”.

მეუფე იაკობის თქმით, მას თავისი ნათქვამის დამადასტურებელი ყველა დოკუმენტი აქვს.

ნეტგაზეთი შეეცდება, მეუფე იაკობის მონაყოლი გადაამოწმოს იმ პირებთან, ვისაც ის ახსენებს.

განახლება, 16:48: პრემიერმინისტრი გიორგი გახარია მეუფე იაკობის ბრალდებებს სისულელეს უწოდებს.

ნეტგაზეთის მასალების სხვა გამოცემებში გადაბეჭდვის წესი
ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.