ბორის ნემცოვს პარასკევს, 27 თებერვალს მოსკოვში ესროლეს. მიყენებული ჭრილობების შედეგად ის ადგილზე გარდაიცვალა.

BBC–ის ცნობით, ოპოზიციის მხარდამჭრები დღეს, 1 მარტს მოსკოვში, კრემლის მახლობლად შეიკრიბნენ და იმ ხიდისკენ გაემართნენ, სადაც ნემცოვი მოკლეს.

როგორც BBC წერს, ნემცოვი დღეს თავისი მხარდამჭერების მარშს უნდა გაძღოლოდა, თუმცა მისმა მკვლელობის გამო სამგლოვიარო მიტინგი გაიმართა.

მოსკოვის ხელმძღვანელობამ თავდაპირველად ნებართვა 50 000 ადამიანზე გასცა, მაგრამ ორგანიზატორები აცხადებდნენ, რომ ნემცოვის მკვლელობის გამო შესაძლოა მარშზე უფრო მეტი ადამიანი მოსულიყო.

აქციის მონაწილეებს ხელში ეჭირათ ბორის ნემცოვის ფოტოები და პლაკატები წარწერებით, “არ მეშინია”, “მე ვარ ნემცოვი” და ა.შ. მარშის მონაწილეებს თან ჰქონდათ ყვავილები და რუსეთის დროშები, ასევე იყო უკრაინის რამდენიმე დროშაც.

რამდენიმე ათასმა ადამიანმა მიიღო სამგლოვიარო მარშში მონაწილეიობა სანკტ პეტერბურგშიც.

ნემცოვის მხარდამჭერები მის მკვლელობაში კრემლის მონაწილეობაზე საუბრობენ, თუმცა პრეზიდენტმა ვლადიმერ პუტინმა ეს მკვლელობა დაგმო და პირობა დადო, რომ მკვლელებს იპოვიდა. 

რუსეთის საგამოძიებო კომიტეტმა კი დააწესა ჯილდო 3 მილიონი რუბლის ($49,000) ოდენობით მათთვის, ვინც ამ მკვლელობასთან დაკავშირებით მათ ინფორმაციას მიაწოდებს.

ფოტორეპორტაჟი მომზადებულია ევროპის პრესფოტოსააგენტოს (EPA) ფოტოებით