ჰამზა ბინ ლადენი

ბინ ლადენის შვილი მოკლულია – ამერიკული მედია

“ალ-კაიდას” დამფუძნებლის, ოსამა ბინ ლადენის შვილი, ჰამზა ბინ ლადენი, საჰაერო დარტყმებს ემსხვერპლა. ინფორმაციას ამერიკული მედია დაზვერვის უწყების ოფიციალურ პირებზე დაყრდნობით ავრცელებს.

მომხდარის დეტალები უცნობია. გავრცელებულ ცნობებზე ოფიციალურ კომენტარს პენტაგონი და აშშ-ის პრეზიდენტი დონალდ ტრამპი ჯერჯერობით არ ახმიანებენ. მისი გარდაცვალება ჯერ არც ტერორისტულ დაჯგუფებას დაუდასტურებია.

ჰამზა ბინ ლადენი “ალ-კაიდას” პოტენციურ ლიდერად მიიჩნეოდა. გავრცელებულ ვიდეო და აუდიოჩანაწერებში ის აშშ-სა და სხვა ქვეყნებზე შეტევის მოწოდებებს ახმიანებდა. მასთან დაკავშირებით ინფორმაციის სანაცვლოდ აშშ-ის მთავრობას 1 მილიონი დოლარის ოდენობის ჯილდო აქვს დაწესებული.

ცნობების თანახმად, ოსამა ბინ ლადენის შვილი ბოლო ორი წლის განმავლობაშია დაღუპული. თუმცა ზუსტი დრო და ადგილი ცნობილი არ არის. აშშ-ის მედია მხოლოდ იმას წერს, რომ ჰამზა ბინ ლადენი დაიღუპა სამხედრო ოპერაციის დროს, რომელშიც აშშ-ის ძალებიც ფიგურირებდნენ.

ჰამზა ბინ ლადენი აშშ-ს საერთაშორისო ტერორისტად ჰყავდა გამოცხადებული. ქვეყნის მთავრობა მის შესაძლო ადგილსამყოფელად პაკისტანს, სირიას, ერაყსა და ირანს ასახელებდა.

BBC-ის ცნობით, “ალ-კაიდას” 2011 წელს მოკლული ლიდერის შვილის ბოლო საჯარო მიმართვა 2018 წლის მარტით თარიღდება. მაშინ ის არაბეთის ნახევარკუნძულის მოსახლეობას ამბოხისაკენ მოუწოდებდა.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან