“აი, მთავრობაზე დიდი არასამთავრობოები რომ არიან, უფრო სწორად, პიროვნებები- ლომჯარია, კოჟორიძე და გიგაური. ჩვენ ძალიან საინტერესო კვლევას დავდებთ მათზე. თვითონ მათთან გვაქვს ძალიან ბევრი კითხვები. ამის უფლება გვაქვს”, – განაცხადა ივანიშვილმა. მას მოტივაცია არ დაუკონკრეტებია.
ექსპრემიერმა ლომჯარია, კოჟორიძე და გიგაური ფარული მოსმენების კანონის კონტექსტში ახსენა და მათი პოზიცია პრეზიდენტ მარგველაშვილს დაუკავშირა. არასამთავრობოები მარგველაშვილთან ერთად მხარს ფარული მოსმენების ე.წ. გასაღების შსს-დან გატანას უჭერდნენ.
ივანიშვილის ამ განცხადებას უკვე გამოეხმაურა “საერთაშორისო გამჭვირვალობა-საქართველოს” ხელმძღვანელი ეკა გიგაური:
“მზად ვარ კვლევის შემკვეთს და ავტორებს გავუწიო დახმარება ინფორმაციის მოპოვებაში! გთხოვთ, დამიკავშირდეთ”, – დაწერა გიგაურმა ფეისბუკზე.
