ქვეშეთი-კობის საავტომობილო გზის მონაკვეთს ჩინეთის რკინიგზის 23-ე ბიუროს ჯგუფი ააშენებს

ქვეშეთი-კობის საავტომობილო გზის მონაკვეთს ჩინეთის რკინიგზის 23-ე ბიუროს ჯგუფი ააშენებს. მთავრობამ მოიწონა კომპანიასა და საავტომობილო გზების დეპარტამენტს შორის გასაფორმებელი ხელშეკრულების პროექტი.

მიმდინარე წლის ივნისში ცნობილი გახდა, რომ ჩინეთის რკინიგზის კონსტრუქციის კორპორაციას (CRCC) და მის ორ შვილობილ კომპანიას, — ჩინეთის რკინიგზის კონსტრუქციის საერთაშორისო კორპორაციას (CRCC International) და ჩინეთის რკინიგზის 23-ე ბიუროს ჯგუფს (CR23), — საქართველოში აღმოსავლეთ-დასავლეთის ჩქაროსნული მაგისტრალის დერეფნის გაუმჯობესების პროექტზე გამოვლენილი დარღვევების გამო, მსოფლიო ბანკმა 9 თვით აუკრძალა საკუთარ ტენდერებში მონაწილეობა.

რეგიონული განვითარებისა და ინფრასტრუქტურის მინისტრი მაია ცქიტიშვილი აცხადებდა, რომ კომპანიის შესაძლო გადაცდომები საგზაო დეპარტამენტმა დაადგინა და პროექტის დამფინანსებელს, მსოფლიო ბანკს აცნობა:

“მსოფლიო ბანკის შიდა კომიტეტმა განიხილა ჩვენ მიერ მიწოდებული იფორმაცია, რის საფუძველზეც 9 თვის განმავლობაში შეუზღუდა ამ კომპანიას არა სამუშაოების შესრულება, არამედ ახალ ტენდერებში მონაწილეობის მიღება. შესაბამისად, ეს შეზღუდვა შეეხება 9-თვიან პერიოდს ამ კომპანიისა და მსოფლიო ბანკის მიერ დაფინანსებულ ტენდერებს. ეს კომპანია ვეღარ მიიღებს მონაწილეობას 9 თვის განმავლობაში იმ ახალ ტენდერებში, რომელსაც მსოფლიო ბანკი გამოაცხადებს.”

მსოფლიო ბანკის თანახმად, წინასწარი კვალიფიკაციისა და ფასის შეთავაზების ეტაპებზე აღნიშნულმა სამმა კომპანიამ „ჩინეთის რკინიგზის 23-ე ბიუროს ჯგუფის“ პერსონალზე, აღჭურვილობასა და გამოცდილებაზე მცდარი ინფორმაცია წარადგინა. უფრო ზუსტად, მსოფლიო ბანკის ინფორმაციით, დამფუძნებელი კომპანიის, „ჩინეთის რკინიგზის კონსტრუქციის კორპორაციის“ (CRCC-ის) პერსონალი, აღჭურვილობა და გამოცდილება ისე გაასაღეს, თითქოს ეს „23-ე ჯგუფისა“ ყოფილიყო. არადა, ადგილზე არა მთავარი კომპანია (CRCC), არამედ „23-ე ბიურო“ მუშაობდა.

მსოფლიო ბანკის ადმინისტრაციული სანქციების სისტემა ამ ქმედებას თაღლითობად მიიჩნევს. სწორედ ამის გამო ბანკმა 5 ივნისს განაცხადა, რომ ამ კომპანიებს 9 თვით აუკრძალეს მათ ტენდერებში მონაწილეობა.

რაც შეეხება უშუალოდ პროექტს, საავტომობილო გზების დეპარტამენტის ინფორმაციით, ქვეშეთი-კობის გზაზე დაგეგმილია ორზოლიანი ასფალტ-ბეტონის – 22.7 კმ. გზის, 6 ხიდისა და 5 გვირაბის  მშენებლობა, მათ შორის- ერთი 9 კმ-იანი გვირაბის მშენებლობა. გვირაბი სოფელ წკერესთან დაიწყება და სოფელ კობთან დასრულდება, აღნიშნული გვირაბი ჯვრის უღელტეხილის ქვეშ გაივლის.

უწყების ცნობითვე, პროექტის დასრულების შემდეგ, არსებული 35 კმ-იანი გზის ნაცვლად, ქვეშეთიდან კობამდე გადაადგილების მანძილი 12 კმ-ით შემცირდება და 1-საათიანი მგზავრობის ნაცვლად აღნიშნული გზის გავლა 20 წუთში იქნება შესაძლებელი.

ქვეშეთი-კობის მონაკვეთის სამშენებლო სამუშაოებს აზიის განვითარებისა  და ევროპის რეკონსტრუქციისა და განვითარების ბანკი აფინანსებენ. სამშენებლო სამუშაოები  2019 წლის ბოლოს უნდა დაიწყოს.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.