მელია კავშირზე იყო ჯგუფთან, რომელიც 21 ივნისის დილით ქალაქს არბევდა – გახარია

შინაგან საქმეთა მინისტრის, გიორგი გახარიას განცხადებით, “ნაციონალური მოძრაობის” ერთ-ერთი ლიდერი ნიკა მელია კავშირზე იყო დემონსტრანტთა ჯგუფთან, რომელიც 20 ივნისის ღამის შემდეგ, გამთენიისას, “ქალაქს არბევდა”. ამის შესახებ მან TV პირველის ეთერში ისაუბრა.

“…რამდენიმე მსხვილი ჯგუფი უბრალოდ გაიშალა ქალაქში: ეს იყო რუსთაველის გამზირი, ეს იყო გმირთა მოედანი და მელიქიშვილი. გამთენიამდე ეს ხალხი, მე არ ვამბობ ყველაზე, დაახლოებით, 300-400 ადამიანი, რომლებთანაც პირდაპირ კომუნიკაციაში იყო მათ შორის ნიკანორ მელიაც დილის 5-დან 6 საათამდე გმირთა მოედანზე… ეს იყო ყველაზე მძიმე წუთები, როდესაც ახალ გაღვიძებულ ქალაქს, მოქალაქეებს, პირდაპირ ფიზიკურ რისკს უქმნიდნენ, არბევდნენ. ეს იყო ჩვეულებრივი შეტევები როგორც მოქალაქეზე, ასევე მათ ქონებაზე, ასევე პოლიციაზე” – განაცხადა მან.

გახარიამ ამავე გადაცემაში აღნიშნა, რომ “სრული ფარსია” 20 ივნისის ის კადრები, რომლებიც ნიკა მელიამ გუშინ, 10 ივლისს, ხელისუფლების ვერსიის საპირწონედ გაავრცელა.

ეს კადრები არის სრული ფარსი – გახარია მელიას გავრცელებულ ვიდეოზე

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან