ანტისაოკუპაციო აქციების ორგანიზატორების თქმით, პოლიცია მათ არ აძლევს შესაძლებლობას, სცენასთან აპარატურა შეიტანონ. საუბარია ხმის გამაძლიერებლებზე, დინამიკებსა და მიკროფონებზე.
ანტისაოკუპაციო აქცია, რომლის მოთხოვნაც შს მინისტრ გიორგი გახარიას გადადგომაა, 19:00 საათზე უნდა გაიმართოს რუსთაველზე, პარლამენტთან. ამ ადგილას დღეს ასევე შეკრებილები არიან მმკ, ლევან ვასაძის მხარდამჭერები და სხვები რამდენიმე მოთხოვნით: გაუქმდეს ანტიდისკრიმინაციული კანონი, პარლამენტმა მიიღოს რუსეთში მოქმედი “გარყვნილების პროპაგანდის აკრძალვის” კანონი და ხელისუფლებამ არ დაუშვას ღირსების მარშის ჩატარება პრაიდის ფარგლებში.
მმკ-ის წევრმა, დეკანოზმა დავით ქვლივიძემ განაცხადა, რომ რუსთაველზე ანტისაოკუპაციო ჯგუფს აქციას არ ჩაატარებინებენ. რუსთაველზე მისულ მიშა მშვილდაძეს, რომელიც ანტისაოკუპაციო აქციების სერიის ერთ-ერთი ორგანიზატორია, ბოთლებიც ესროლეს. ამჟამად რუსთაველზე იმყოფება 19:00 საათზე დაგეგმილი აქციის ორგანიზატორთა ნაწილი.