ნიკა მელია

იმედია, გახარია პარლამენტში შესვლას ვერ გაბედავს და ვერც შეიპარება — მელია

„ერთიანი ნაციონალური მოძრაობის“ ერთ-ერთი ლიდერი, ნიკა მელია, რომლის დაპატიმრებასაც ცოტა ხნით ადრე პარლამენტმა დაუჭირა მხარი, აცხადებს, რომ 28 ივნისს შინაგან საქმეთა მინისტრი გიორგი გახარიას პარლამენტში მისვლა „წარმოუდგენელია“.

„ეს ახალგაზრდობა მე-6 დღეა ითხოვს გახარიას თანამდებობიდან წასვლას, ის კი წასვლას კი არ აპირებს, ისევ აქ მოსვლას აპირებს“, — უთხრა მელიამ პარლამენტის უკან შეკრებილ მხარდამჭერებს.

„იმედია, მეც მომეცემა თქვენთან ერთად შესაძლებლობა, ზეგ [აქ] ვიყო და მივიღო აქტიური მონაწილეობა, რომ გახარიამ აქ შესვლა ვერ გაბედოს და ვერც მელიასავით შეიპაროს“, — განაცხადა მან.

ამის შემდეგ მელიამ თქვა, რომ პარლამენტის უკან შეკრებილი ადამიანები უნდა შეუერთდნენ მთავარ აქციას, რომელიც პარლამენტის წინ მე-7 დღეა მიმდინარეობს. „ჩვენ ვართ მართლები და ამაზე დიდი სიამოვნება არ არსებობს. როდესაც შეგიძლია რაოდენობით შენზე მეტ ადამიანს დუმილით დაახრევინო თავი“, — ამბობს ის.

საქართველოს პარლამენტმა რამდენიმე საათით ადრე თანხმობა მისცა გენერალურ პროკურორს დეპუტატ ნიკა მელიასთვის პატიმრობის გამოყენების მიზნით სასამართლოსთვის მიმართვაზე, 91 ხმით 0-ის წინააღმდეგ.

შინაგან საქმეთა მინისტ გიორგი გახარიას პარლამენტში 28 ივნისს ელოდებიან. მან თვითონ სთხოვა დეპუტატებს, 20 ივნისის დარბევის საკითხზე სიტყვით გამოვიდეს პლენარულ სესიაზე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია 2018 წლის 1 სექტემბრიდან არის ნეტგაზეთის რეპორტიორი. ის ადრეც მუშაობდა ნეტგაზეთში — 2016 წლის მაისიდან 2017 წლის თებერვლამდე. Email: lukapertaia@gmail.com