ნეტგაზეთი | პარლამენტთან აქციაზე 17 სამოქალაქო და 38 სამართალდამცველი დაშავდა – ჯანდაცვა პარლამენტთან აქციაზე 17 სამოქალაქო და 38 სამართალდამცველი დაშავდა – ჯანდაცვა – Netgazeti
RU | GE  

პარლამენტთან აქციაზე 17 სამოქალაქო და 38 სამართალდამცველი დაშავდა – ჯანდაცვა

ჯანდაცვის სამინისტროს ინფორმაციით, პარლამენტთან აქციაზე 17 სამოქალაქო პირი და 38 სამართალდამცველი დაშავდა.

უწყების ინფორმაციით, დაშავებულ სამოქალაქო პირებს საშუალო და მსუბუქი დაზიანებები აღენიშნებოდათ, ხოლო სამართალდამცველებიდან 4 კლინიკა “დეკაშია“ ჰოსპიტალიზირებული. დანარჩენებს სასწრაფომ დახმარება ადგილზე გამოუჩინა.

პირდაპირი ეთერი:


რა მოხდა

პარლამენტთან უკვე რამდენიმე საათია მიმდინარეობს მრავალათასიანი  აქცია. აქციის მონაწილეები ითხოვენ შინაგან საქმეთა მინისტრ გიორგი გახარიას, პარლამენტის თავმჯდომარის ირაკლი კობახიძის და სახელმწიფო უსაფრთხოების სამსახურის უფროსი ვახტანგ გომელაურის გადადგომას, ასევე ვადამდელი საპარლამენტო არჩევნების დანიშვნას პროპორციული სისტემით. აღნიშნულ აქციას წინ უძღოდა რუსეთის დუმის დეპუტატების ვიზიტი საქართველოში და პარლამენტის თავმჯდომარის სავარძლიდან მართლმადიდებლობის საპარლამენტთაშორისო გენერალური ასამბლეის სესიის გახსნა. აღნიშნულის შემდეგ, შესვენებისას, პარლამენტის სხდომათა დარბაზში შევიდნენ “ევროპული საქართველოსა” და “ერთიანი ნაციონალური მოძრაობის” დეპუტატები და სესიის გაგრძელების საშუალება არ მისცეს.

გავრილოვი სხვა ქვეყნის დეპუტატებთან ერთად თბილისში მართლმადიდებლობის საპარლამენტთაშორისო გენერალური ასამბლეის რიგით 26-ე სესიაში მონაწილეობის მისაღებად ჩამოვიდა. რუსულ დელეგაციას სწორედ ის ხელმძღვანელობდა. ღონისძიება ცერემონიების სასახლეში (პრეზიდენტის ყოფილი სასახლე) 19 ივნისს გაიხსნა და მასში მონაწილეობა საქართველოს პარლამენტის თავმჯდომარემაც მიიღო.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან