მომიტინგეები თავისუფლების მოედანზე მივიდნენ ტრანსპარანტებით – “წინ, სერჟის გარეშე სომხეთისკენ!” “ვადამდელი არჩევნები!” “თავისუფლება პოლიტპატიმრებს!” ასევე, ხალხი სკანდირებდა: “სომხეთი სერჟის გარეშე!” “თავისუფალი დამოუკიდებელი სომხეთი!”

საპარლამენტო ფრაქციის “სომხეთის ეროვნული კონგრესის” თავმჯდომარემ ლევონ ზურაბიანმა მომიტინგეებს შეახსენა სისტემური კანონდარღვევები, რასაც ადგილი ჰქონდა ქვეყანაში ყველა ჩატარებული არჩევნების დროს, გაიხსენა პოლიტპატიმრები, თავდასხმები ყარაბაღის ომის მონაწილეებზე, ოლიგარქების გაძლიერება, მიგრაცია და ა.შ.

მან განაცხადა, რომ “ხალხი თავად არის საკუთარი უფლებების მეპატრონე და არავინ მისცემს მას თავისუფლებას, თუკი თვითონვე არ აიღებს სადავეებს საკუთარ ხელში. ნებაყოფლობით არც ერთი რეჟიმი არ ჩააბარებს ხელისუფლებას, არ მისცემს თავისუფლებას მოქალაქეებს, მოქალაქეები თვითონ მოიპოვებენ ამ თავისუფლებას!”

ლევონ ზურაბიანმა ასევე წაიკითხა მიტინგის შედეგად მიღებული განცხადება, რომელშიც აღნიშნულია, რომ ადამიანის უფლებები სომხეთში სისტემატიურად ირღვევა: “ჩვენ არ მოვითმენთ და უახლოეს მომავალში წარვუდგენთ ხალხს სამოქმედო გეგმას, რომლის მიხედვითაც მივაღწევთ ხელისუფლების ცვლილებას ვადამდელი არჩევნების გზით,” – განაცხადა ლევონ ზურაბიანმა.

თავისუფლების მოედნიდან მანიფესტაციის მონაწილეები გაემართნენ ევრსაბჭოს საპარლამენტო ასამბლეის ოფისისკენ ერევანში, ხოლო შემდეგ დაბრუნდნენ მოედანზე. ორგანიზატორებმა შეკრებილებს აცნობეს, რომ მომდევნო აქციის თარიღს მოგვიანებით შეატყობინებენ, რამდენადაც “ბრძოლა გამარჯვების მიღწევამდე გაგრძელდება”.

მიტინგი და მსვლელობა ჩატარდა ინციდენტების გარეშე. პოლიციას, რომელიც დღეს გაძლიერებულ რეჟიმში მუშაობდა ქალაქში, არავითარი წინააღმდეგობა არ გაუწევია აქციის მონაწილეებისთვის, პირიქით – ავტოსატრანსპორტო საშუალებებისგან გაათავისუფლა ის ქუჩები ქალაქის ცენტრში, რა მარშრუტიც მოიცვა მსვლელობამ.