საქართველოს ჯარი, ჩვენი სიამაყე, არის და იქნება აპოლიტიკური და არ დავუშვებთ შეიარაღებული ძალების პოლიტიზებას,–განაცხადა საქართველოს პრემიერ–მინისტრმა თავდაცვის მინისტრთან და გენერალური შტაბის უფროსთან შეხვედრის დასრულების შემდეგ.
„თავდაცვის მინისტრთან და გენშტაბის უფროსთან ერთად, შევაჯამეთ ბოლო დღეებში ქვეყანაში განვითარებული მოვლენები და შევთანხმდით იმაზე, რომ საქართველოს ჯარი, ჩვენი სიამაყე, არის და იქნება აპოლიტიკური და ჩვენ ამ კურსს აუცილებლად შევინარჩუნებთ. საქართველოს მთავრობა გააკეთებს ყველაფერს, რათა ხელი შეუწყოს ჯარის განვითარებას, მისი თავდაცვისუნარიანობის ამაღლებას, წინსვლას და ჯარისკაცების პირობების გაუმჯობესებას,“–აღნიშნა პრემიერ–მინისტრმა.
შეხვედრა მთავრობის ადმინისტრაციაში გაიმართა, რომელზეც შეხვედრის მთავარი თემა ქართული ჯარის განვითარების პერსპექტივები და სამომავლო გეგმები იყო.
