პირველი ასეთი ხალხმრავალი აქცია ოპოზიციამ 10 ოქტომბერს გამართა და ლიდერებმა მაშინ პირობა მისცეს შეკრებილ ხალხს, რომ ყველა ღონეს იხმარდნენ ხელისუფლების შესაცვლელად, რომელიც, მათი თქმით, უძლურია გამოასწოროს ქვეყანაში მძიმე სოციალურ-ეკონომიკური ვითარება, შეაჩეროს მიგრაცია, რომელიც სულ უფრო და უფრო მასობრივი ხასიათის ხდება, ებრძოლოს უმუშევრობას, ჩინოვნიკების აღვირახსნილობასა და კრიმინალს, ასევე, ფასების ზრდას სხვადასხვა პროდუქტზე.

იგივე გაიმეორეს ორგანიზატორებმა ამ აქციაზეც. საპარლამენტო ფრაქცია “სომხეთის ეროვნული კონგრესის” მდივანმა არამ მანუკიანმა განაცახდა, რომ დღეს თავისუფლების მოედანი და იქ შეკრებილი “თავისუფლებისმოყვარე ხალხი“ ითხოვს ქვეყანაში ხელისუფლების ცვლილებას.

“ხელისუფლების ცვლილება, სერჟ სარგსიანის დანაშაულებრივი რეჟიმისგან გათავისუფლება არის სომხეთის მთელი ხალხის მოთხოვნა,” – განაცხადა მანუკიანმა, რომელმაც მოუწოდა შეკრებილებს ოპოზიციური სამეულის მიერ დაწყებული პროცესის გარშემო კონსოლიდაციისკენ.

სომხეთის პირველმა პრეზიდენტმა, “სომხეთის ეროვნული კონგრესის” ლიდერმა ლევონ ტერ-პეტროსიანმა ხალხს მოუწოდა, არ შეუშინდნენ არაფერს და გააგრძელონ ბრძოლა გამარჯვებამდე, მანამ, სანამ “სარგსიანის დამნაშავე რეჟიმი არ დაეცემა”.

მოედანზე შეკრებილი ხალხი ორგანიზატორებისადმი მხარდაჭერას გამოხატავდა შეძახილებით – “სერჟიკ, წადი!” “გამარჯვება!” “ბრძოლა ბოლომდე!”

მიტინგზე ოპოზიციური პარტიების სამივე ლიდერი გამოვიდა სიტყვით, რომლებმაც გამოაცხადეს ქვეყანაში უვადო მოძრაობა ხელისუფლების გადასაყენებლად. მიღებული იქნა გადაწყვეტილება, რომ ასეთი მასობრივი საპროტესტო აქციები ჩატარდება კვირაში ერთხელ – “მანამ, სანამ ხელისუფლება არ შეიგნებს, რომ მისი დრო დასრულდა”.

მასალა მომზადებულია პროექტ “სამხრეთ კავკასიის ამბების” ფარგლებში ჰაინრიჰ ბიოლის ფონდის მხარდაჭერით. პროექტის ფარგლებში მომზადებული ტექსტები შეიცავს იმ ტერმინოლოგიას, რომელიც აფხაზეთის, სამხრეთ ოსეთის და მთიანი ყარაბაღის თვითაღიარებულ რესპუბლიკებში გამოიყენება. მასალებში გამოთქმული მოსაზრებები შესაძლოა არ ემთხვეოდეს ჰაინრიჰ ბიოლის ფონდის და ნეტგაზეთის პოზიციას.