ჯარისკაცზე სავარაუდო ძალადობის ფაქტზე გამოძიება დაიწყო

თავდაცვის სამინსიტროს ინფორმაციით, წვევამდელზე სავარაუდო ძალადობის ფაქტზე გამოძიება სისხლის სამართლის კოდექსის 386-ე მუხლის პირველი ნაწილით დაიწყო, რაც ურთიერთდაუქვემდებარებელ სამხედრო მოსამსახურეებს შორის დამოკიდებულების წესის დარღვევას გულისხმობს.

სამინისტროს ინფორმაციით, სამხედრო პოლიციის მიერ უკვე გამოიკითხა წვევამდელის მიერ დასახელებული სერჟანტი, დაცვის უზრუნველყოფის ასეულის მორიგე, რომელიც წვევამდელზე რაიმე სახის ძალადობას კატეგორიულად უარყოფს.

“წინასწარი გამოკითხვის შედეგად, აღნიშნული ფაქტი არ დასტურდება. თუმცა, წვევამდელის მიერ გაცხადებული ძალადობის შესაძლო ფაქტის დადასტურების შემთხვევაში, ყველა დამნაშავე პირი კანონის სრული სიმკაცრით აგებს პასუხს,” – წერია თავდაცვის სამინისტროს განცხადებაში.

მათივე თქმით, აღნიშნული დანაშაული 3 წლამდე თავისუფლების აღკვეთას გულისხმობს. რაც შეეხება წვევამდელს, ამ დროისთვის მისი გამოკითხვა მიმდინარეობს.

წვევამდელი ირწმუნება, რომ მას სცემეს და ფულს სძალავდნენ

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან