ნეტგაზეთი | “სანქციები ჯოჯოხეთიდან” – აშშ-ის სენატორთა ინიციატივა რუსეთის წინააღმდეგ “სანქციები ჯოჯოხეთიდან” – აშშ-ის სენატორთა ინიციატივა რუსეთის წინააღმდეგ – Netgazeti

“სანქციები ჯოჯოხეთიდან” – აშშ-ის სენატორთა ინიციატივა რუსეთის წინააღმდეგ

“ამერიკული საზოგადოების დაცვა კრემლის აგრესიისგან” – ასე ჰქვია სანქციათა ახალ პაკეტს რუსეთის წინააღმდეგ, რომელიც აშშ-ის დემოკრატიული და რესპუბლიკური პარტიების რამდენიმე სენატორმა წარადგინა. სანქციები რუსეთის მიერ უკრაინაში განხორციელებულ ინტერვენციასა და აშშ-ის არჩევნებში შესაძლო ჩარევას ეხება.

Reuters-ის ცნობით, სანქციათა პაკეტი მოიცავს რამდენიმე ქვეთავს, რომლებიც რუსეთთან დაკავშირებულ შესაძლო უკანონო ქმედებებს აერთიანებს. მათ შორისაა უკანონო კიბერაქტივობები, კორუფცია, ჩარევა რიგ დემოკრატიულ პროცესებში, არჩევნებსა და ა.შ. პაკეტის დამტკიცების შემთხვევაში, აშშ-ის პრეზიდენტს ევალება, სანქციები დაუწესოს იმ ადამიანებსა და კომპანიებს, რომლებიც ამ პროცესებში პირდაპირ თუ ირიბად არიან ჩართულნი.

ინიციატივის დამტკიცების შემთხვევაში, სანქციები რუსეთის გაზისა და ნავთობის წარმოებასაც შეუქმნის პრობლემებს. მაგალითად, ერთ-ერთი პუნქტის თანახმად, სანქციებს დაექვემდებარებიან ადამიანები, რომლებიც პირდაპირ უწყობენ ხელს რუსეთის შესაძლებლობას, განავითაროს თხევადი გაზის ობიექტები რუსეთის საზღვრებს გარეთ, 1-მილიონიანი ან მეტი ინვესტიციით. შემდგომი პუნქტი კი სანქციებით ემუქრება რუსეთის მთავრობის მფლობელობაში არსებული კომპანიების ენერგეტიკული პროექტების ხელშემწყობ პირებს.

Reuters-ის ინფორმაციით, ინიციატივა რუსეთის ფინანსური ბაზრის წარმომადგენელთათვის შოკისმომგვრელი აღმოჩნდა. რესპუბლიკელმა სენატორმა ლინდსი გრამმა კი, რომელიც ინიციატივის ერთ-ერთი მხარდამჭერია, პროექტს უწოდა “სანქციები ჯოჯოხეთიდან”.

ახლა სანქციათა პაკეტი კონგრესმა უნდა განიხილოს. მისი უფრო ხისტი ვერსია გასულ წელს ჩავარდა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან