ზვიად კუპრავას დაკავების ფაქტს სახალხო დამცველი სწავლობს

“გაერთიანებული ოპოზიციის” წევრის ზვიად კუპრავას დაკავების ფაქტს სახალხო დამცველის აპარატი სწავლობს. ომბუდსმენის პრესსამსახურში ნეტგაზეთს უთხრეს, რომ დარღვევის შემთხვევაში სახალხო დამცველს რეაგირება ექნება.


შინაგან საქმეთა სამინისტროს ინფორმაციით, თბილისის საქალაქო სასამართლოს გადაწყვეტილების საფუძველზე, დღეს, 24 თებერვალს “გაერთიანებული ოპოზიციის” წევრი ზვიად კუპრავა დააკავეს.

შსს-ს ცნობით, 2018 წლის 11 ივნისს ზვიად კუპრავამ სასამართლოს შენობაში სიტყვიერი შეურაცხყოფა მიაყენა მოსამართლეს. მომხდარზე შსს-მ გამოძიება სისხლის სამართლის კოდექსის 366-ე მუხლით (სასამართლოს უპატივცემულობა) დაიწყო.

ამ საქმეზე ზვიად კუპრავას სასამართლომ გირაო შეუფარდა. “გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატს. აღნიშნული ქმედებისთვის ზვიად კუპრავას სისხლის სამართლის კოდექსის 126-ე მუხლით (ძალადობა) ბრალი დაუსწრებლად წარედგინა, ვინაიდან მან თავი აარიდა სამართალდამცავ ორგანოში გამოცხადებას,”-წერია შსს-ს მიერ გავრცელებულ განცხადებაში.

21 თებერვალს სასამართლოს უპატივცემულობის საქმეზე, ზვიად კუპრავას აღკვეთის ღონისძიება გირაო პატიმრობით შეეცვალა. შსს-ს ინფორმაციით, ამ გადაწყვეტილების მიზეზი გახდა გირაოს პირობების დარღვევა და მისთვის ახალი ბრალის წაყენება.

მის წინააღმდეგ მიმდინარე საგამოძიებო პროცესს კუპრავა პოლიტიკური მოტივებით ხსნის. “მე არ ვაპირებ შევცვალო ჩემი დღის წესრიგი ან გავიქცე. თუ ვინმეს უნდა მოსვლა, აქ ვარ. ჩემ წინააღმდეგ ორი საქმეა, ორივეს პოლიტიკური მოტივი აქვს და არცერთს არ აქვს კავშირი სამართალთან,”-აცხადებს ზვიად კუპრავა.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.