ახალი ამბები

ქალთა საკითხი საქართველოს დემოკრატიულ რესპუბლიკაში – ახალი ნაშრომის პრეზენტაცია

14 თებერვალი, 2019 • 2767
ქალთა საკითხი საქართველოს დემოკრატიულ რესპუბლიკაში  – ახალი ნაშრომის პრეზენტაცია

13 თებერვალს თბილისში წიგნის, სახელწოდებით “ქალები და ქალთა საკითხი საქართველოს დემოკრატიულ რესპუბლიკაში (1918-1921) “ პრეზენტაცია გაიმართა. ნაშრომი ლელა გაფრინდაშვილის ავტორობით მკვლევართა ჯგუფმა მოამზადა და მასში ასახულია ამ პერიოდის საქართველოში ქალთა სამოქალაქო, პოლიტიკური და საზოგადოებრივი აქტიურობის შესახებ არსებული ისტორიული მასალებია.

 

როგორც პროექტის ხელმძღვანელი და წიგნის თანაავტორი ლელა გაფრინდაშვილი “ნეტგაზეთთან” აღნიშნავს, მსგავსი ნაშრომის შექმნის იდეა ამ მიმართულებით ინფორმაციის სიმწირის გამო გაჩნდა. მისი თქმით, მიუხედავად იმისა, რომ 2018-2021 წლების პერიოდი პირვლი რესპუბლიკის საიუბილეო წელია, ქალთა საკითხებზე საკმარისად ყურადღება არ მახვილდება:

“მინდოდა ფოკუსირებულად ამ პერიოდის ქალებზე გვემუშავა და მოგვეცვა ისეთი სფეროები, როგორებიცაა კოოპერაცია, 1917 წელი, როგორც 1918 წლის მოსამზადებელი პერიოდი, ქალთა სამოქალაქო და საზოგადოებრივი აქტიურობა და ქალთა გაერთიანებები. ასევე, 1919 წლის არჩევნები, სახალხო უნივერსიტეტები და პროფკავშირები. ეს იყო ის სფეროები, რაზეც მკვლევრები, მათ შორის ცისანა გოდერძიშვილი, სალომე ჭანტურიძე, ირაკლი ირემაძე, ირაკლი ხვადაგიანი და მე ლელა გაფრინდაშვილი ვმუშაობდით”, – ამბობს გაფრინდაშვილი.

მისი თქმით, მკვლევრების მიერ მოძიებული მასალები მოიცავს წერილებს და სხვა ისტორიულ ფაქტებს, რომლებიც წიგნში უცვლელადაა შესული:

“ჩემთვის უმნიშვნელოვანესი იყო, რომ ანალიტიკურ სტატიებზე მეტად წარმოგვეჩინა, თავად ამ ეპოქაში ვინ წერდა და რას წერდა ამ თემებზე. მინდოდა, მკვლევრების სტატიების ნაცვლად, სადაც გაანალიზებული  იქნებოდა ეს მასალები, თავად წაიკითხოს ისინი მკითხველმა და შეიგრძნოს”, – ამბობს მკვლევარი.

როგორც გაფრინდაშვილი აღნიშნავს, ერთ-ერთი ყველაზე მნიშვნელოვანი აღმოჩენა, რომელიც წიგნზე მუშაობის პერიოდში გააკეთა, საქართველოს მართლმადიდებელი ეკლესიის ავტოკეფალიის დაბრუნების პროცესში ქალთა ჩართულობა იყო:
“მნიშვნელოვანი იყო, რომ ისეთ მნიშვნელოვან მოვლენაში, როგორიც ავტოკეფალიის აღდგენაა, ქალებიც იყვნენ ჩართულნი და ძალიან საინტერესო პოზიციებით. ავტოკეფალიის აღდგენის შემდეგ თვითონ ჩვენი ეკლესიის სხდომის ოქმებიც ძალიან საინტერესოა, რომლებშიც  დებატი მიმდინარეობს საეკლესიო ცხოვრებაში ქალების მონაწილეობაზე.
ძალიან მნიშვნელოვანი და საინტერესოა, რომ ის სფეროც არ იყო სტერილური ამ თემისგან, რაც როგორც შთამაგონებელია თანამედროვე მკვლევრისთვის, ასევე უცვლის შეხედულებას მკითხველს, ვთქვათ, იმაზე, რასაც კომუნისტები გვასწავლიდნენ”, – აღნიშნავს ნაშრომის ავტორი.
აღნიშნული პროექტი განხორციელდა კავშირის „ქალების ინციატივა თანასწორობისათვის” (WIE) მიერ, ფრიდრიხ ებერტის ფონდის (FES) მხარდაჭერით. როგორც წიგნის ავტორი ამბობს, აღნიშნული ნაშრომი ქვეყნის მასშტაბით ბიბლიოთეკებში გავრცელდება. ასევე იგეგმება მისი ელექტრონული ვერსიის შექმნაც.

მასალების გადაბეჭდვის წესი