სომხეთის პრემიერ- მინისტრმა ნიკოლ ფაშინიანმა France24-თან საუბარში განაცხადა, რომ მიმდინარე თვის 16 რიცხვამდე გადადგება.

გამოცემასთან ინტერვიუში ფაშინიანმა არჩევნების სავარაუდო თარიღი  9-10 დეკემბერი დაასახელა.

“ამისთვის მე 16 ოქტომბრამდე უნდა გადავდგე”, – ამბობს ფაშინიანი.

ფაშინიანის ბოლო სცენარის შესაბამისად, მისი გადადგომის შემდეგ პარლამენტი ორივე ჯერზე ვერ აირჩევს პრემიერ-მინისტრს, რის შემდეგაც პარლამენტს დაითხოვენ და ახალი ვადამდელი არჩევნები გამოცხადდება.

ნიკოლ ფაშინიანის მოწოდებით, ვადამდელი არჩევნების მოთხოვნით ერევნის პარლამენტთან ათასობით ადამიანი 2 ოქტომბერს გამოვიდა. ფაშინიანმა მაშინ განაცხადა, რომ მრავალათასიანმა სპონტანურმა მიტინგმა დაადასტურა, რომ ვადამდელი საპარლამენტო არჩევნები საყოველთაო მოთხოვნაა და ის, ვინც მის ჩატარებას შეეწინააღმდეგება, სომეხ ხალხს ომს გამოუცხადებს.

ნიკოლ ფაშინიანმა სომხეთის პრემიერის პოსტი 2018 წლის 8 მაისს, ხანგრძლივი საპროტესტო აქციების შემდეგ დაიკავა, თუმცა, საპარლამენტო უმრავლესობას დღემდე ყოფილი მმართველი პარტია “რესპუბლიკელები” წარმოადგენს.