ახალი ამბებისამხრეთ კავკასიის ამბები

ცხინვალში ტატუნაშვილის საქმე დახურეს

21 ივნისი, 2018 • 2641
ცხინვალში ტატუნაშვილის საქმე დახურეს

“ტატუნაშვილი გულის იშემიური დაავადების შედეგად გულის მწვავე უკმარისობით დაიღუპა, რაც აჩვენა როგორც წინასწარმა ექსპერტიზამ, ასევე დამოუკიდებელმა რუსულმა ექსპერტიზამაც. საქმე დახურულია სამხრეთ ოსეთის კომპეტენტური ორგანოების მიერ”, – ნათქვამია სამხრეთ ოსეთის დე ფაქტო რესპუბლიკის საგარეო უწყების განცხადებაში.

აღნიშნულ განცახდებაში ცხინვალი ეხმაურება საქართველოს პროკურატურის მიერ არჩილ ტატუნაშვილის, ლ.ქ-სა და ი.პ-ს მიმართ, წინასწარი შეთანხმებით, ჯგუფის მიერ თავისუფლების უკანონო აღკვეთასა და არჩილ ტატუნაშვილის ჯგუფურად წამებაში დახმარებისთვის ადგილობრივი სამართალდამცველებისთვის ბრალის დაუსწრებლად წარდგენას – საქართველოს პროკურატურამ დაუსწრებლად წარუდგინა სამართალდამცავი ორგანოს თანამშრომლებს: დავით გურწიევს და ალიკ ტაბოევს.

“ქართული მხარე, რომელიც პოლიტიკურ დივიდენდების მოპოვებას ცდილობს, ბრმად იყენებს აღნიშნულ ტრაგიკულ ინციდენტს ვითარების გასამძაფრებლად. სიბრიყვეა იმის დაშვება, რომ სამხრეთ ოსეთის რესპუბლიკის სამართალდამცველი სტრუქტურების წარმომადგენლები, რომლებიც სამხრეთ ოსეთის ტერიტორიაზე არსებული კანონის შესაბამისად საკუთარ სამსახურეობრივ მოვალეობას ასრულებენ, პირველი დაძახებიდანვე საქართველოს პოლიციას ჩაბარდებიან”, – ნათქვამია უწყების მიერ გავრცელებულ განცხადებაში.

საქართველოს პროკურატურის ინფორმაციით, გამოძიებით დადგინდა, რომ საქართველოს მოქალაქე არჩილ ტატუნაშვილი პერიოდულად დადიოდა ოკუპირებული ახალგორის რაიონის ტერიტორიაზე, სადაც ეწეოდა მცირე სამეწარმეო საქმიანობას. 2018 წლის 20 თებერვალს, მას შემდეგ, რაც მან დატოვა ზემოხსენებული ტერიტორია, ოკუპირებული ცხინვალის რეგიონის ე.წ. სამართალდამცავი ორგანოს თანამშრომლებისთვის ცნობილი გახდა, რომ არჩილ ტატუნაშვილი მსახურობდა საქართველოს შეიარაღებულ ძალებში 2008 წლის აგვისტოში, რის გამოც გადაწყვიტეს მისი დასჯა და წამება.

როგორც პროკურატურა აცხადებს, 2018 წლის 22 თებერვალს საქართველოს მოქალაქეები- არჩილ ტატუნაშვილი, ი.პ. და ლ.ქ. საქართველოს ხელისუფლების მიერ კონტროლირებადი ტერიტორიიდან შევიდნენ ოკუპირებული ახალგორის ტერიტორიაზე, სადაც არჩილ ტატუნაშვილის კუთვნილი ავტომანქანით და ლ.ქ-ს მართვის ქვეშ მყოფი ავტომანქანით შეიტანეს ხილ-ბოსტნეული. აღნიშნული გარემოება ცნობილი გახდა ოკუპირებული ცხინვალის რეგიონის ე.წ. სამართალდამცავი ორგანოს თანამშრომლებისთვის და გადაწყვიტეს, რომ არჩილ ტატუნაშვილისთვის უკანონოდ აღეკვეთათ თავისუფლება, მიეყვანათ მათთვის ხელსაყრელ ადგილზე და ეწამებინათ.

მიზნის მისაღწევად, 2018 წლის 22 თებერვალს ახალგორის რაიონის სოფელ მოსაბრუნთან არჩილ ტატუნაშვილს, ი.პ-ს და ლ.ქ-ს ოკუპირებული ახალგორის ე.წ პროკურატურის პროკურორის თანაშემწემ დავით გურწიევმა, ოკუპირებული ახალგორის ე.წ „КГБ“-ს სამსახურის განყოფილების უფროსმა ალიკ ტაბოევმა და ოკუპირებული ცხინვალის რეგიონის ე.წ. სამართალდამცავი ორგანოს სხვა თანამშრომლებმა ჯგუფურად, უკანონოდ აღუკვეთეს თავისუფლება და ჯერ არჩილ ტატუნაშვილი, ხოლო მოგვიანებით – ი.პ. და ლ.ქ. გადაიყვანეს ახალგორის რაიონის ე.წ. უშიშროების სამსახურის შენობაში, სადაც არჩილ ტატუნაშვილს დაადეს ხელბორკილი და წამების მიზნით გადასცეს ოკუპირებული ცხინვალის რეგიონის ე.წ. სამართალდამცავი ორგანოს შეიარაღებულ თანამშრომლებს, რომლებმაც იგი წაიყვანეს ცხინვალში. არჩილ ტატუნაშვილის ცხინვალში გადაყვანამდე ლ.ქ. და ი.პ. დროებით გაათავისუფლეს, თუმცა შემდგომ კვლავ აღუკვეთეს თავისუფლება ცხინვალის ე.წ. პროკურატურის შენობაში. ოკუპირებული ცხინვალის რეგიონის ე.წ. სამართალდამცველებმა 2008 წლის აგვისტოს ომში მონაწილეობისთვის არჩილ ტატუნაშვილი აწამეს, რა დროსაც სხეულზე მიაყენეს სხვადასხვა სახის 100-ზე მეტი დაზიანება. მოგვიანებით არჩილ ტატუნაშვილი გარდაიცვალა.

“ვინაიდან ბრალდებულები, დავით გურწიევი და ალიკ ტაბოევი თავს არიდებენ სამართალდამცავ ორგანოებში გამოცხადებას, მათ დაუსწრებლად წარედგინათ ბრალდება საქართველოს სისხლის სამართლის კოდექსის 143-ე მუხლის მე-3 ნაწილის „ა“ და „გ“ (თავისუფლების უკანონო აღკვეთა – წინასწარი შეთანხმებით ჯგუფის მიერ, ორი ან მეტი პირის მიმართ) და 25-1441 მუხლის მე-2 ნაწილის „ე“ და „ზ“ ქვეპუნქტებით (წამებაში დახმარება, ჩადენილი ჯგუფურად, დაკავებულის ან სხვაგვარად თავისუფლებაშეზღუდული პირის მიმართ)”, – აცხადებს პროკურატურა.

პროკურატურა კანონით დადგენილ ვადაში მიმართავს სასამართლოს ბრალდებულების მიმართ აღკვეთის ღონისძიების სახით პატიმრობის გამოყენების მოთხოვნით. როგორც უწყება აცხადებს, სისხლის სამართლის საქმეზე გრძელდება გამოძიება დანაშაულის ჩამდენი სხვა პირების დადგენის მიზნით. გამოძიებას აწარმოებს საქართველოს შინაგან საქმეთა სამინისტრო. დავით გურწიევისთვის და ალიკ ტაბოევისთვის წარდგენილი ბრალდება სასჯელის სახედ და ზომად ცხრიდან თხუთმეტ წლამდე თავისუფლების აღკვეთას ითვალისწინებს.

 

მასალების გადაბეჭდვის წესი