კახა კალაძის განცხადებით, თბილისის მერია ე.წ. “ხრუშჩოვკების” ჩანაცვლების პროექტს იწყებს.  კალაძის თქმით, მერია ვარკეთილის მე-6  და მე-8 კვარტლებში 4 ავარიული კორპუსის სრულად ჩანაცვლებისთვის ინტერესთა გამოხატვას აცხადებს.

დედაქალაქის მერის თქმით, საწყის ეტაპზე პროექტი ვარკეთილის მესამე მასივში ოთხ ავარიულ “ხრუშჩოვკას” შეეხება:

„ჩემს წინა საარჩევნო კამპანიაში ხშირად ვსაუბრობდი აღნიშნულ საკითხზე. ბევრი სკეპტიკურად იყო განწყობილი და არ სჯეროდა, რომ შესაძლებელი იქნებოდა ე.წ. „ხრუშჩოვკების“ ჩანაცვლების პროექტის განხორციელება. როგორც კი ოფიციალურად უფლებამოსილება მოგვეცა, მაშინვე შევუდექით ამ მიმართულებით სამუშაოებს, თუ რა შეიძლებოდა წარმოგვედგინა მოსახლეობისთვის. დღეს უკვე წარმოდგენილია პირველი პროექტი.  მერია აცხადებს ინტერესთა გამოხატვას ვარკეთილის მესამე მასივში მდებარე 30 205 კვ.მ (3,2 ჰექტარი) მიწის ნაკვეთზე საცხოვრებელი კომპლექსის განვითარების მიზნით და კერძო სექტორს ვიწვევთ“, – განაცხადა კალაძემ.

კალაძის თქმით, ინტერესთა გამოხატვაში გამარჯვებული პირი აღნიშნულ პროექტს თბილისის საკრებულოს მიერ დამტკიცებული განაშენიანების რეგულირების გეგმის შესაბამისად განახორციელებს და გარკვეული რაოდენობის ფართებს მუნიციპალიტეტს გადასცემს. ამასთან, დედაქალაქის მერის განცხადებით, პირველ ეტაპზე თანამედროვე ევროპული ტიპის ფართებს  170 ოჯახი მიიღებს. 

„ამ ეტაპზე საუბარია ვარკეთილის მესამე მასივის მე-6 და მე-8 კვარტალებში მდებარე ოთხი მწვავედ ავარიული კორპუსის სრულად ჩანაცვლებაზე. ასევე, ვარკეთილის მესამე მასივისა და ზემო პლატოზე მდებარე ნაკლებად მწვავე ავარიული კორპუსების მაცხოვრებლების გადაყვანაზე; ჩვენ შეგვიძლია უკვე დავიწყოთ მოლაპარაკებები ამ ოჯახებთან და მათ ექნებათ რეალურად შეძალებლობა იმის, რომ ახალი, თანამედროვე ევროპული ტიპის საცხოვრებელი ფართები მიიღონ და ღირსეული საცხოვრებელი პირობები ჰქონდეთ. პირველ ეტაპზე 170 ოჯახზეა საუბარი. თუმცა ეს არ არის ერთჯერადი პროექტი. ეს არის ცოცხალი პროცესი, რომელიც შესაძლებლობას მოგვცემს, ე.წ. „ხრუშჩოვკების“ ჩანაცვლების პროექტი საკმაოდ მასშტაბურად განვახორციელოთ“, – აღნიშნა დედაქალაქის მერმა.