ახალი ამბები

უგულავას წინააღმდეგ ომბუდსმენს 500-ზე მეტმა თანამშრომელმა მიმართა – საჯარო რეესტრი

5 აპრილი, 2018 • 2799
უგულავას წინააღმდეგ ომბუდსმენს 500-ზე მეტმა თანამშრომელმა მიმართა – საჯარო რეესტრი

საჯარო რეესტრის ცნობით, სახალხო დამცველის ოფისში გიგი უგულავას წინააღმდეგ შეტანილ განცხადებას 506 თანამშრომელი აწერს ხელს, ხელმოწერების შეგროვება კი კვლავ გრძელდება.

რეესტრის თანამშრომლებმა ომბუდსმენს მიმართეს გიგი უგულავას ფეისბუკის პოსტის გამო, სადაც, უგულავა აკრიტიკებს საჯარო რეესტრის თანამშრომლებს, რომელთაც, პაპუნა უგრეხელიძის სახელთან დაკავშირებული სექსუალური შევიწროების სკანდალის შემდეგ ყოფილ უფროსთან გამოსამშვიდობებელ შეხვედრაზე ფოტო გადაიღეს.

“მიმდინარე წლის 28 მარტს პოლიტიკური გაერთიანება ,,ევროპული საქართველოს“ ლიდერმა გიგი უგულავამ სააგენტოს თანამშრომლებს საჯაროდ მიაყენა შეურაცხყოფა. მან სოციალურ ქსელში გავრცელებულ განცხადებაში საჯარო რეესტრის თანამშრომლები დამამცირებელი ეპითეტებით მოიხსენია, როგორიცაა: „სამარცხვინო ქალი“, „ქალი დეკორაცია“, „გაბადრული ქალი“.

გაკეთებულ განცხადებაში სიძულვილის ენით გაჟღენთილი და დამამცირებელი ზემოაღნიშნული ეპითეტები წარმოადგენს სქესის ნიშნით დისკრიმინაციას და მიმართულია საჯარო რეესტრში დასაქმებული ადამიანების პატივისა და ღირსების, საქმიანი რეპუტაციის შელახვისაკენ. საჯარო პირის მიერ სქესის ნიშნით  ქალთა გამორჩევა და მათ მიმართ ასეთი დამამცირებელი, სალანძღავი სიტყვების გამოყენება წარმოადგენს ქალთა მიმართ დისკრიმინაციის საჯაროდ წახალისებას.

ეს ადამიანები ყოველდღიური, დაუღალავი შრომით აშენებენ საქართველოს მომავალს, მათ ჰყავთ ოჯახები, ზრდიან შვილებს და არიან საკუთარი საქმის პროფესიონალები. სწორედ მათი მონაწილეობითა და დაუღალავი შრომის შედეგად შეიქმნა  მსოფლიოში ერთ-ერთი ყველაზე წარმატებული უძრავი ქონებისა და ბიზნესის რეგისტრაციის სისტემა.

გიგი უგულავა ამ სიტყვებით მოიხსენიებს მისთვის სრულიად უცნობ ადამიანებს, რომლებმაც ნაყოფიერი 5-წლიანი მუშაობის შემდეგ ერთობლივი ფოტო გადაიღეს და ღიმილით დაუდასტურეს პატივისცემა ყოფილ ხელმძღვანელს- პაპუნა უგრეხელიძეს. სოციალურ ქსელში საჯარო რეესტრის ეროვნულ სააგენტოში დასაქმებული ქალების მიმართ წარმოებული კამპანია, რაც არ უნდა იყოს მისი წარმოების რეალური მოტივი, ხაზს უსვამს მამაკაცის დომინანტურ როლს, ამკვიდრებს გენდერულ დისკრიმინაციას, აღვივებს სტიგმას და სტერეოტიპებს, რაც განაპირობებს ქალების მარგინალიზაციას და ხელს უწყობს საზოგადოებაში მცდარი წარმოდგენების ფორმირებას.

ვიმედოვნებთ, რომ სამოქალაქო საზოგადოება, მათ შორის არასამთავრობო ორგანიზაციები, ადეკვატურ შეფასებას მისცემენ საჯარო რეესტრში დასაქმებული ქალების მიმართ გაჟღერებულ შეურაცხმყოფელ საჯარო განცხადებებს, ხოლო მედიასაშუალებები საზოგადოებისთვის ხელმისაწვდომს გახდიან და ობიექტურად გააშუქებენ საჯარო რეესტრში დასაქმებული თანამშრომლების პოზიციას და მიმდინარე მოვლენებს.

ჩვენ, საჯარო რეესტრის თანამშრომლები, მივმართავთ საქართველოს სახალხო დამცველს – ნინო ლომჯარიას, შესაბამისი რეაგირება მოახდინოს გიგი უგულავას საჯარო განცხადებაზე და უზრუნველყოს ქალთა პატივისა და ღირსების დაცვა,”- აცხადებს საჯარო რეესტრი.

მასალების გადაბეჭდვის წესი