შსს-მ თავდაპირველად გაავრცელა ცნობა, რომ დაკავებული 1998 წელს დაბადებული, 15 წლის მოზარდი იყო, თუმცა მოგვიანებით აღნიშნულ უწყებაში განაცხადეს, რომ შეცდომა გაეპარათ და დაკავებული 1988 წელს დაბადებული, 25 წლის მამაკაცია.
გამოძიების ცნობით, დაკავებული სხვისი სახელით, სხვადასხვა სოციალური ქსელის მეშვეობით, მოქალაქე ნ. ბ-სთან ვირტუალურ ინტიმურ კავშირს ამყარებდა და ჩაწერილი ჰქონდა სექსუალური ხასიათის ვიდეორგოლები.
“მოგვიანებით თ. ჩ. დაუკავშირდა ნ. ბ-ს და მოსთხოვა მისთვის 400 ლარი გადაერიცხა, წინააღმდეგ შემთხვევაში, მისი პირადი ცხოვრების ამსახველი მაკომპრომატებელი მასალების სოციალურ ქსელში ატვირთვით დაემუქრა”, – ნათქვამია შსს-ს მიერ გავრცელებულ განცხადებაში.
პოლიციის ცნობით, სამართალდამცველებმა მისი საცხოვრებელი ბინიდან კუთვნილი ორი ლეპტოპი ამოიღეს.
შსს-ს მიერ გავრცელებულ ვიდეომასალაში ჩანს, რომ ამოღებული ტექნიკის შორისაა ნეტბუქი, რომელიც პირველკლასელებს საქართველოში უფასოდ ურიგდება სკოლებში.
პოლიციის ცნობით, დაკავებული ჩადენილ დანაშაულს აღიარებს.
გამოძიება გამოძალვის ფაქტზე მიმდინარეობს (სსსკ-ის 181-ე მუხლის 1-ლი ნაწილით, ისჯება ჯარიმით ან თავისუფლების აღკვეთით ვადით ორიდან ოთხ წლამდე).
![„ჩალის ფასიც არა, ჩალაძის ფასი აქვს [ევროპარლამენტის] რეზოლუციას“ — კობახიძე](https://netgazeti.ge/wp-content/uploads/2024/03/Untitled-design-4-13.jpg "„ჩალის ფასიც არა, ჩალაძის ფასი აქვს [ევროპარლამენტის] რეზოლუციას“ — კობახიძე")