მძღოლებს კუთვნილი სატრანსპორტო საშუალებები ქალაქის ცენტრალურ ნაწილში, მერიის წინ ჰყავთ დაყენებული. ადგილზე მობილიზებულია საპატრულო პოლიცია. გაფიცულები ახალი საქალაქო ხაზების გაუქმებას მოითხოვენ, რადგან, მათი თქმით, მგზავრთა ნაკადმა მოიკლო:
“ვეღარ ვმუშაობთ. ორი კვირის წინ დაგვპირდნენ არსებული პრობლემების მოგვარებას და ამ პრობლემების მოგვარების ნაცვლად პარალელური ხაზები გაგვიხსნეს. თავისთავად ამის გამო მგზავრთა ნაკადმა მოიკლო და ვეღარ ვმუშაობთ. იმდენი მგზავრი აღარ ამოდის, რომ საწვავი ჩავასხათ, ავტობუსს მოვუაროთ, ოჯახში ფული მივიტანოთ. ამ წუთში ჩვენ ამ ხაზების გაუქმებას მოვითხოვთ. ჩვენ ხელფასი საერთოდ არ გვაქვს, ყოველდღიურ გამომუშავებაზე ვართ დამოკიდებული. თუ ვინმეს უშლის ახალი ხაზი ხელს, ყველა აქაა. ბაკისუბანზე მომუშავე ყველა მძღოლი აქ არის,” – ამბობს #1 ხაზზე მომუშავე ავტობუსის მძღოლი ნოდარ ხურციძე.
აქციის მონაწილეებს უკვე შეხვდა ქალაქის სატრანსპორტო სამსახურის უფროსის მოვალეობის შემსრულებელი ნესტორ კეპულაძე და მერის მოვალეობის შემსრულებელი კოტე ლომიძე. ლომიძემ ჟურნალისტებს კომენტარზე უარი უთხრა. ამჟამად მძღოლები მოლაპარაკებას მასთან მართავენ. პარალელურად საპატრულო პოლიცია გაფიცულებს სატრანსპორტო საშუალებების ქალაქის ცენტრალური ნაწილიდან გაყვანას მოუწოდებს.
თავის მხრივ, მძღოლების ნაწილი კეპულაძის გადადგომას მოითხოვს.
“ამ ადამიანის მოსვლის შემდეგ ისედაც არეული ტრანსპორტის სფერო უარესად აირია. მთელი სამსახური არის შესაცვლელი, რადგან ისინი ერთი გუნდია,” – ამბობს #22 საქალაქო ხაზზე მომუშავე ავტობუსის მძღოლი, რამაზ ეგუტიძე.
