31 იანვრიდან-4 თებერვლის ჩათვლით, გერმანიის ქალაქ ნიურნბერგში, სათამაშოების გამოფენაზე “Spielwarenmesse 2018” სამი ქართული კომპანია – “კოდალა“, “ჯეოთოიზ” და “თამაშობანა” მიიღებს მონაწილეობას – ამის შესახებ ინფორმაციას ეკონომიკის სამინისტრო ავრცელებს.
მათივე ცნობით, საერთაშორისო გამოფენაზე ქართული კომპანიები მონაწილეობას სააგენტოს „აწარმოე საქართველოში“ ორგანიზებით მიიღებენ.
ეკონომიკის სამინისტროს ცნობით, სათამაშოების წარმოების კუთხით ეს ღონისძიება მსოფლიოში ერთ-ერთი ყველაზე მასშტაბური და პრესტიჟულია, რომელშიც 60 ქვეყნიდან 2850-ზე მეტი სათამაშოების მწარმოებელი კომპანია მონაწილეობს, ვიზიტორების რაოდენობა კი ყოველწლიურად დაახლოებით 73 000-ს შეადგენს.
“სათამაშოების გამოფენაზე – “Spielwarenmesse 2018” მონაწილეობის მიზანი ქართული კომპანიების ხელშეწყობა და უცხოელ პოტენციურ პარტნიორებთან და დამკვეთებთან ბიზნესკავშირების დამყარებაა,”- აცხადებს ეკონომიკის სამინისტრო.
