“ვფიქრობ, ყველა, ვინც მონაწილეობდა არჩევნებში, გამარჯვებას ელოდა. თუ ადამიანი არ ელოდები გამარჯვებას, ბუნებრივია, არჩევნებში არ მონაწილეობ. არ ვიყავი დარწმუნებული, რომ ასეთ დიდ უპირატესობას მომცემდა აკადემიური საბჭო. ძალიან დიდი ნდობაა გამოცხადებული ჩემ მიმართ,”- განაცხადა პაპავამ. 

მისივე თქმით, უნივერსიტეტში ბევრი ამოცანაა შესასრულებელი, რომელიც ეტაპობრივად უნდა განხორციელდეს.

“მთავარია ის, რომ უნივერსიტეტი გახდეს საერთაშორისო დონის, დაიბრუნოს მან თავისი ღირსეული სახელი. რაც შეეხება კონკურსების საკითხს, ამასთან დაკავშირებით რექტორის კომპეტენცია შეზღუდულია, კანონი ითვალისწინებს, რომ ყველამ თავისი საკონკურსო ვადა უნდა დაასრულოს. როცა ისინი დასრულდება გამოცხადდება ახალი კონკურსები, რომელშიც მონაწილეობის მიღება შეეძლება ყველას, როგორც მოქმედ პროფესორებს, ასევე ყველა იმათ, ვინც არ არის დღეს მოქმედი პროფესორი, და აქვს უნარი და სურვილი უნივერსიტეტს დაუბრუნდეს. ჩვენ უნდა უზრუნველვყოთ ამ კონკურსების სამართლიანობა და გამჭვირვალობა. 

ძალიან ბევრი რამეა უნივერსიტეტში შესაცვლელი, პირველ რიგში ის, რომ უნივერსიტეტმა უნდა მისცეს ადეკვატური ცოდნა საერთაშორისო დონის და ამ მიმართულებით არის ნაბიჯები გადასადგმელი. ასევე, ის, რომ უნივერსიტეტში გაძლიერდეს სამეცნიერო კვლევა, და სტუდენტების ჩართულობა სამეცნიერო კვლევაში.”

პაპავამ უნივერსიტეტის პროფესორების ანაზღაურებაზე და სტუდენტებზეც ისაუბრა:

“უნივერსიტეტის ბიუჯეტი არის რაციონალურად გამოსაყენებელი, ისე, რომ ყველა პროფესორს ჰქონდეს ადეკვატური ანაზღაურება. გარდა ამისა, დამატებით მოსაძიებელია სახსრები, რაც პროფესორებს დამატებით მისცემს შემოსავალს.”

ახალი რექტორის განმარტებითვე, ის სტუდენტებთან აქტიურ მუშაობას აპირებს და გეგმავს, როომ მათთან შესახვედრად სპეციალური დრო გამოყოს. 

დღეს თსუ-ის რექტორობის არჩევნებში ლადო პაპავამ 10 ხმით გაიმარჯვა. დანარჩენი 2 ხმა ირმა რატიანმა მიიღო. კენჭისყრაში მონაწილეობა არ მიუღია ყოფილ რექტორ სანდრო კვიტაშვილს, თუმცა ლადო პაპავამ განაცხადა, რომ პირველი მილოცვა უნივერსიტეტიდან სწორედ მისგან მიიღო.