საპარლამენტო უმრავლესობის წევრის ლევან ბერძენიშვილის აზრით, მსგავსი დანაშაულის მოხდენა ნიშნავს, რომ მოქალაქე ნებისმიერ ტერიტორიაზე დაცული არ არის:
“ეს არის ძალიან მძიმე შემთხვევა, იმიტომ, რომ მომხდარია ისეთი ტიპის დანაშაული, როდესაც სახელმწიფო გრძნობს პასუხისმგებლობას, იმიტომ, რომ ასეთი დანაშაული როცა ხდება, ეს ნიშნავს, რომ არ არის უზრუნველყოფილი, დაცული არ არის მოქალაქე ნებისმიერ ტერიტორიაზე.”
დეპუტატი მიიჩნევს, რომ სამინისტრომ მონაცემების გამოქვეყნება იჩქარა და ირანის მოქალაქის უდანაშაულობის პრეზუმფცია დაარღვია:
“რა თქმა უნდა, უნდა იყოს დაცული ირანის მოქალაქის უდანაშაულობის პრეზუმფცია, მაგრამ შინაგან საქმეთა სამინისტროს მიაჩნია, რომ საქმე გაიხსნა, ასეთ შემთხვევაში, მათ იჩქარეს მონაცემების გადმოცემა, იმიტომ, რომ მათ შეხედეს არა ადამიანის უფლებათა თვალსაზრისით, არამედ შეხედეს იმ თვალსაზრისით – ოჯახი როგორ უყურებს ამას და საზოგადოება როგორ უყურებს ამას და ბათუმის სეზონი საერთოდ როგორ წავა და საქართველოს იმიჯი როგორ იქნება. აქ ეს არჩევანი გაკეთდა იმიტომ, რომ ამ ინფორმაციის გამჟღავნებით საქმე არ ფუჭდება წმინდა ტექნიკური თვალსაზრისთ, იმიტომ, რომ იმ კაცის დაჭერა არის ტექნიკური საკითხი, თუ მართლა ის აღმოჩნდება დამნაშავე.”
ბერძენიშვილი მიიჩნევს, რომ საქმე მაღალი ინტერესების კონფლიქტთან გვაქვს. მისივე თქმით, მართალია, პრეზუმფცია დაირღვა, მაგრამ რახან პირი საქართველოს მოქალაქე არ არის, მისი რეპუტაცია არ ილახება:
“ასეთ დროს არავინ იფიქრა იმაზე, რომ ისიც ადამიანია და მასაც იცავს უდანაშაულობის პრეზუმფცია და სხვა, მაგრამ აქ არის მაღალი დონის ინტერესების კონფლიქტი. ასეთი რამ ხდება ხოლმე. ძალიან ძნელია უფლებათა დაცვაზე ფიქრი მაშინ, როდესაც, მაგალითად, ტერაქტი მზადდება და სხვა. ეს ყოველთვის არის კონფლიქტი. მთელ მსოფლიოში არის ამაზე კამათი. ეს არ არის ყველაზე ცუდი რამ, რაც გაუკეთებია შინაგან საქმეთა სამინისტროს ისტორიის მანძილზე, თუმცა კარგია, რომ “ნეტგაზეთი” ყურადღებას აქცევს იმასაც, რომ ირანის მოქალაქე შეიძლება არ აღმოჩნდეს დამნაშავე, ბოლოს და ბოლოს, მაგრამ ასეთ შემთხვევაში, ვინაიდან ჩვენთან არ ცხოვრობს და სხვა, მისი საქმიანი და სხვა ტიპის რეპუტაცია არ ილახება. ამიტომ, აქ ძალიან ძნელი იქნება თქვენს პოზიციაზე ბოლომდე ყოფნა. წმინდა უფლებათა დაცვის თვალსაზრისთ, რა თქმა უნდა, დავარღვიეთ უდანაშაულობის პრეზუმფცია, მაგრამ უფრო მაღალმა ინტერესმა გადაფარა ამ შემთხვევაში და მე ვერ გეტყვით, რომ ზუსტად ვიცი, რომელია სწორი.”
მისივე განმარტებით, შს სამინისტროს ადგილზე ისიც ანალოგიურად მოიქცეოდა და უფლებას დაარღვევდა:
“დავარღვევდი უფლებას და გარკვეული გაგებით ეს სერიოზული მომენტი იქნებოდა და ამაზე შეიძლებოდა ლაპარაკი, მაგრამ ყოველ შემთხვევაში ძალიან მაღალი ინტერესი იყო და ისეთი ინფორმაციაც გავიდა, რომ, აი, შსს-მ ამდენი საქმე გახსნა, იმდენი საქმე გახსნა, რომელიც არაფერს არ ეუბნებოდა ოჯახს. ამ კონკრეტულ შემთხვევაში, როცა დამნაშავე ცნობილია, ინტერესი გადადის იმაზე, რომ ინტერპოლი ჩაერთვება და დამნაშავე უნდა იპოვონ, თუ ის აღმოჩნდა დამნაშავე, ბუნებრივია. “
ბერძენიშვილს მიაჩნია, რომ სამინისტროს სიჩქარე პოლიტიკურმა ოპონენტებმა გამოიწვიეს:
“მე ვიცი, რატომ მოხდა ეს ასე. იმიტომ, რომ პოლიტიკური მოწინააღმდეგე არ თვლემს და ის არ ფიქრობს არც ადამიანზე, არც ადამიანის უფლებებზე. უნდა გითხრათ, რომ ამ შემთხვევაში მომხდარი არის ძალიან სამარცხვინო რამ. ამ ტრაგედიით ვიღაც პოლიტიკურმა ძალებმა დააპირეს სარგებლობა და დააპირეს იმის თქმა, რომ, აი, ამნისტიის შედეგი არის, რომ გამოუშვეს მკვლელები, დაძრწიან და სხვა. ამაზე იყო პასუხი. როცა აღმოჩნდა, რომ ეჭვმიტანილი უცხოელია და ეს აღმოჩნდა არა იმიტომ, რომ ვიღაცამ მოიფიქრა, არამედ იმიტომ, რომ მოწმეთა ჩვენება ამბობდა, რომ დამტვრეული ქართულით ლაპარაკობდა, დამახასათებელი გარეგნობა ჰქონდა და სხვა, თუ ეს ყველაფერი სიმართლეა, რა თქმა უნდა, ჩვენ ღმერთები არ ვართ, რომ ყველაფერი ვიცოდეთ. ამაზე რეაქცია იყო პოლიტიკურ, მე ვთვლი, უზნეობაზე იყო რეაქცია. სააკაშვილმა პირადად დააპირა პოლიტიკური დივიდენდები მიეღო. საერთოდ, ეს კაცი ვერ ხვდება, რომ მთავრდება მისი მოღვაწეობა. ჩაერია ამ საქმეში ძალიან უხეში და ცუდი ფორმით, ოჯახის მიმართ, საზოგადოების მიმართ არ გამოიჩინა ადამიანობა. ჩემი აზრით, ამან გამოიწვია სწრაფი რეაქციები სამინისტროს მიერ.”
დეპუტატის განცხადებით, “ქართულმა ოცნებამ” და მისმა მოწინააღმდეგეებმა უნდა იცოდნენ, რომ ადამიანის ტრაგედია ყველაფერზე მაღლა დგას:
“ბევრად უფრო მაღლა დგას, ვიდრე რამდენი ხანი იქნება და როგორი ბედნიერი იქნება პრეზიდენტი სააკაშვილი და სხვა. მან ვერც ერთი წამით ვერ წარმოიდგინა, რომ ვიღაცის ტრაგედია, შეიძლება, მის კარიერაზე მაღლა იდგეს. ეს ასევე ეხება ხელისუფლებასაც. ხელისუფლებამაც რაღაც მომენტში ვერ წარმოიდგინა, რომ მას შეიძლება ჩრდილი მიადგეს. აქ არ არის მარტო ოჯახის ინტერესი, არის კიდევ დაცულობის ინტერესი, სახელმწიფოებრივი ინტერესი და ამ შემთხვევაში, ეს ინტერესები შეასკდნენ ერთმანეთს და მიღებული იყოს ის გადაწყვეტილება, რომელსაც მე ვერ ვაკრიტიკებ, მიუხედავად იმისა, რომ უფლებადაცვითი თვალსაზრისით ძალიან კარგად მესმის, რა და როგორ უნდა იყოს. ჩვენ ვერავის ვერ ავუკრძალავთ ასეთ ლაპარაკს და თუ არასამთავრობოები ამის გამო გაგვაკრიტიკებენ, ეს კრიტიკა უნდა მივიღოთ. ამავე დროს, მოქმედება იყო სწრაფი და სწორი. საერთოდ, ყოველთვის, როცა საქმე იხსნება, ეს მაინც წარმატებაა, იმიტომ, რომ ძალიან ხშირია, როცა საქმე არის გაუხსნელი.”
მისივე განცხადებით, 16 წლის მარიამ კოჩილაძის მკვლელობა ყველას ბრალია:
“ჩვენ, როგორც სახელმწიფომ, ისე პოზიციამ და ოპოზიციამ უნდა ვუთხრათ დაღუპულის ოჯახს, რომ ეს ტრაგედია, რაც მოხდა, ყველას ბრალია, იმიტომ, რომ ჩვენ ვერ უზრუნველვყავით დაცულობა მოქალაქის. დაცულობას ძალიან სერიოზული ქვეყნებიც ვერ უზრუნველყოფს ხოლმე, და იმის თქმა, რომ არასოდეს არაფერი არ მომხდარა არსად, ჩვენ არ შეგვიძლია. არასოდეს არ ყოფილა არც თბილისი და არც ბათუმი ისე დაცული, რომ ასეთი უბედურება არ მომხდარიყო. ოჯახისთვის, რა თქმა უნდა, სულერთია, ეს დანაშაული რა ხასიათისაა. 16 წლის ბავშვი რომ იღუპება, ამაზე დიდი ტრაგედია რა უნდა მოხდეს ? მაგრამ საზოგადოებისთვის მნიშვნელობა აქვს, ეს დანაშაული სისტემურია, თუ- არა? თუ ეს იქნება, მაგალითად, ის, რომ ჩვენ ვათავისუფლებთ ბანდიტებს ციხიდან, ისინი ხალხს ხოცავენ და სხვა, და ეს მიიღებს სისტემურ ხასიათს, გასაგებია, მაგრამ ეს კონკრეტული შემთხვევა რახან ასეთი არ იყო, ყველას უნდა შეეკავებინა თავი, სანამ საქმე გაიხსნებოდა.”
ბერძენიშვილის თქმით, საზოგადოება, იმისათვის, რომ ადამიანის უფლებებზე იფიქროს, ძალიან პოლიტიზებულია. დეპუტატი ასევე შს სამინისტროს საზოგადოებასთან ურთიერთობის სამსახურის და ეკა ბესელიას მიერ დანაშაულის სტატისტიკაზე საუბარს ეხმიანება და ამბობს, რომ მათ ოჯახზე არ იფიქრეს:
“სააკაშვილმა არ იფიქრა უფლებებზე. ყველა, ვინც სტატისტიკა გამოაქვეყნა, არ იფიქრა იმაზე, რომ ოჯახისთვის სულერთია სტატისტიკა, რადგან მან დაკარგა ადამიანი და ამ დროს შენ ყვები, რომ სინამდვილეში ეს ზღვაში წვეთია და სხვა რას ნიშნავს ოჯახისთვის ეს ლაპარაკი? გასაგებია. წარმოუდგენელია. ამიტომ პოლიტიკამ გადააჭარბა თანაგრძნობას ადამიანის მიმართ. აი, ეს მოხდა, ყველაზე ცუდი, რაც მოხდა. ამიტომ ყველანაირად უნდა ვეცადოთ, რომ გარდაცვლილი გოგოს ოჯახთან პირნათელი ვიყოთ იმით, რომ დამნაშავე ვიპოვოთ, დავსაჯოთ და ისე ვუთანაგრძნოთ, რომ მან იგრძნოს, რომ თანავუგრძნობთ და არ იგრძნოს, რომ ჩვენ ერთმანეთისთვის ქულების წართმევაზე ვმუშაობთ.”
“ეს საქმე ბოლომდე უნდა მივიდეს და მხოლოდ ამის შემდეგ გაირკვევა სიმართლე იმის შესახებაც, რამდენად სწორი ვართ ჩვენ, როცა ვლაპარაკობთ მის უფლებებზე. თუ ის დამნაშავე აღმოჩნდა, ეს ნაწილი, რომ მის მიმართ ირღვეოდა უფლება, საკმაოდ ფორმალური იქნება, მაგრამ თუ აღმონდა უდანაშაულო, მაშინ სხვა მომენტი იქნება. მხოლოდ სასამართლოს განაჩენის შემდეგ, ყველა თვალსაზრისით, სამართლებრივად არის ადამიანი დამნაშავე. მანამდე ყველა უდანაშაულოა, განურჩევლად იმისა, რა ტიპის დანაშაულზე ვლაპარაკობთ. მესმის თქვენი შეკითხის და შევეცადე გულწრფელად მეპასუხა. ოჯახთან ასე უფრო სწორი ვართ, ვიდრე ის, რომ არ გვეთქვა და მე მგონი, ახლა სწორედ ამ ადამიანებზე უნდა ვიფიქროთ უპირველეს ყოვლისა, მით უმეტეს, რომ სწორედ მათ მიმართ ირღვეოდა ადამიანობის საზღვრები, როდესაც ელაპარაკები არა კონკრეტულ შემთხვევაზე, არამედ ზოგად სტატისტიკაზე, რომელიც ამბობს, რომ ეს არ არის ისეთი მნიშვნელოვანი, თითქოს ამას ამბობს, რაც წარმოუდგენელია, იმიტომ, რომ არ შეიძლება, მაგრამ პოლიტიკური მომენტია. ყოველთვის უნდა გვახსოვდეს, რომ ადამიანი, მისი ცხოვრება, მისი ბედი, უფრო მაღლა დგას, ვიდრე პოლიტიკური ინტერესი, ეს უნდა ესმოდეს ყველას,” – აღნიშნა ლევან ბერძენიშვილმა.