“შენების მოძრაობის” ლიდერის, დავით უსუფაშვილის თქმით, კიევში დღეს განვითარებული მოვლენები უკრაინისთვის დამაზარალებელია და შესაძლოა საქართველოზეც იქონიოს ნეგატიური გავლენა.
“მიხეილ სააკაშვილი იყო საქართველოს პრობლემა, რომელიც უკრაინის ხელისუფლებამ ძალიან მცდარი გადაწყვეტილებებით უკვე საკუთარ პრობლემადაც აქცია და საქართველოსთვისაც კიდევ უფრო გაამძაფრა ეს პრობლემა. რაც დღეს ხდება, ეს პირველ რიგში ურაინისთვისაა ძალიან დამაზარალებელი. ეს უნდა გაეთალისწინებინა უკრაინას, თუმცა მათ არც ჩვენი რჩევები გაითვალისწინეს თავის დროზე და ახლა მივიღეთ ის ვითარება, რაც, კიდევ ერთხელ ვიმეორებ, არ არის კარგი უკრაინისთვის. ხოლო რაც უკრაინისთვის არ არის კარგი, ის არც საქართველოსთვისაა კარგი, ზოგადად” – ამბობს უსუფაშვილი.
რაც შეეხება სააკაშვილის შესაძლო ექსტრადირებას, უსუფაშვილი ამბობს, რომ ის საქართველოს პრობლემაა და ქვეყანამ მასთან გამკლავება უნდა შეძლოს:
“რაც შეეხება სააკაშვილის შესაძლო ექსტრადირებას, ის იყო საქართველოს პრეზიდენტი, შესაბამისად, ის კარგიც და ცუდიც, არის საქართველოს პრობლემა. ამიტომ, როგორც ჩანს, ჩვენს ქვეყანას მოუწევს ამ პრობლემასთან გამკლავება, სამართალდამცავ ორგანოებს, თუ მოხდება მისი ექსტრადირება. მაგრამ სააკაშვილი, როგორც პოლიტიკური ინსტრუმენტი, საკუთარ თავსაც დესტრუქციული მიმართულებით იყენებს. რაც თავის მხრივ სვადასხვა, ერთმანეთთან დაპირისპირებული პოლიტიკური ძალების მხრიდან მისი გამოყენების ცდუნების საფუძველს იძლევა. მე კი არ მინდა, რომ საქართველოში პოლიტიკური ცხოვრება ამ დაღით იყოს დასმული კიდევ ბევრი წელი – დაპირისპირება ყოფილ და დღევანდელ ლიდერებს შორის. და ჩვენ ამას ყველამ ერთად უნდა დავაღწიოთ თავი” – ამბობს უსუფაშვილი.
