ადვოკატი ალიკა დადიანი, რომელიც შსს-ს სამეგრელო-ზემო სვანეთის სამხარეო მთავარი სამმართველოს ორი მოქმედი თანამშრომლის – გ. შ.-სა და მ. ხ-ს ინტერესებს იცავს, აცხადებს, რომ სასამართლოში მათი გირაოს ნაცვლად გათავისუფლების მოთხოვნით იშუამდგომლებს.
ანალოგიური პოზიცია აქვს სამეგრელო-ზემო სვანეთის სამხედრო პოლიციის ყოფილ თანამშრომლის, გ. ბ-ს ადვოკატ ხვიჩა ხეცურიანს.
ამ ეტაპზე უცნობია სხვა დაკავებულების ადვოკატების პოზიცია.
შეგახსენებთ, რომ შსს-მ სამეგრელოს სამალავების საქმეზე 9 პირი დააკავა, ხოლო სამის მიმართ გამოცხადებულია საერთაშორისო ძებნა.
დაკავებულებს შორის არიან შსს-ს სამეგრელო-ზემო სვანეთის სამხარეო მთავარი სამმართველოს კიდევ ერთი მოქმედი თანამშრომელი გ. ჭ. და ყოფილი თანამშრომელი პ. ქ. ისინი დაკავებული არიან იარაღის უკანონო შეძენა-შენახვის, თავისუფლების უკანონო აღკვეთისა და წამების ბრალდებით.
აღნიშნული პირების გარდა, ამავე საქმეზე დაკავებული არიან: თავდაცვის სამინისტროს მოქმედი თანამშრომელი კ. თ, ზუგდიდის პოლიციის ყოფილი უფროსი რ. შ, ზუგდიდის პოლიციის ყოფილი თანამშრომელი ლ. ქ, ი. ა და თ. უ.
შსს-ს ცნობით, ამავე სისხლის სამართლის საქმეებზე დადგენილია შსს-ს ყოფილი მაღალჩინოსნების: მეგის ქარდავას, კოხტა კოდუასა და დავით ჩაგინავას ბრალეულობა. გამოძიების ინფორმაციით, კოხტა კოდუა და დავით ჩაგინავა ამჟამად საქართველოში არ იმყოფებიან, მათზე საერთაშორისო ძებნა გამოცხადდება. მეგის ქარდავა ინტერპოლის წითელი ცირკულარით უკვე იძებნება.