ევროკავშირი ორგანიზაციაში შემავალ ქვეყნებს  უსადენო ინტერნეტის(WiFi) ახალ ქსელს სთავაზობს – ამის შესახებ ევროკავშირის საბჭოს მიერ 9 ოქტომბერს გავრცელებულ განცხადებაშია ნათქვამი.

სქემა, სახელად „WiFi4EU“ ევროკავშირის სახელმწიფოების 6 000-დან 8000-მდე დასახლებას მოიცავს და ძირითადად ქალაქის მერიის შენობებში, ბიბლიოთეკებში, პარკებსა და საზოგადოებრივი თავშეყრის სხვა ადგილებში გავრცელდება. პროექტი ევროპის პარლამენტმა არაფორმალურად მაისში მიიღო, 8 ოქტომბერს კი ევროკავშირის საბჭომ ოფიციალურად დაამტკიცა.

უსადენო ინტერნეტის ახალი ქსელი სწრაფი და ადვილად გამოსაყენები იქნება. განცხადების მიხედვით, WiFi4EU-ს გავრცელების არეალი გეოგრაფიულად დაბალანსდება და ისე მოეწყობა, რომ  სწრაფი ინტერნეტით სარგებლობა ადგილობრივებსა და ტურისტებს თანაბრად შეეძლოთ. ევროპის საბჭო ქსელში ჩართვის მსურველებს მინიმალურ ბიუროკრატიას ჰპირდება და აცხადებს, რომ საჭირო ფინანსების 100%-ს ევროკავშირი დაფარავს.

პროექტის განსახორციელებლად 2017-2019 წლებისთვის 120 მილიონი ევროა გამოყოფილი, 2020 წლისთვის კი სამუშაოები საბოლოოდ დასრულდება. ევროკომისიის პრეზიდენტის ჟან კლოდ-იუნკერის თქმით, სწორედ ამ დროისთვის შეძლებენ ადამიანები ევროკავშირის ყველა სოფლისა და ქალაქის საზოგადოებრივ ცენტრებში უკაბელო ინტერნეტით სარგებლობას.