დღეს, 25 სექტემბერს, თბილისისN 206 საბავშო ბაგა-ბაღის მეორე სართულიდან ბავშვი გადმოვარდა. ამის შესახებ ინფორმაციას ბაღის ადმინისტრაცია და თბილისის ბაგა-ბაღების მართვის სააგენტოში გვიდასტურებენ.
როგორც ბაღის ადმინისტრაციაში განგვიცხადეს, ბავშვი ამჟამად ინგოროყვას კლინიკაში იმყოფება და მისი მდგომარეობა სტაბილურია. იმავეს ამბობენ თბილისის ბაგა-ბაღების მართვის სააგენტოშიც. ამ დროისთვის კლინიკაში იმყოფებიან ბავშვის ახლობლები, ბაღის დირექტორი და სააგენტოს წარმომადგენლები.
ინგოროყვას კლინიკაში განგვიცხადეს, რომ ამ დროისთვის ბავშვი რეამინაციულ განყოფილებაში იმყოფება, სადაც გამოკვლევები უტარდება. თბილისის ბაგა-ბაღების პრესსამსახურის ინფორმაციით, ბავშვს თავი არ აქვს დაზიანებული და სავარაუდოდ არც მოტეხილობები აღენიშნება.
საქართველოს შინაგან საქმეთა სამინისტროში ნეტგაზეთს განუცხადეს, რომ მომხდარზე გამოძიება სისხლის სამართლის კოდექსის 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე დაზიანებას გულისხმობს.
თბილისის N206 ბაგა-ბაღი. ფოტო: მერია
