გიორგი მარგველაშვილმა უარყო ბრალდება იმის შესახებ, რომ სამინისტრო ცალკეული სტამბების შერჩევით გარკვეულ მონოპოლიებს ქმნის.
“არანაირი ინტერესი არ არსებობს, რომ რაიმე ტიპის მონოპოლია შევქმნათ. მარტივი მათემატიკაა. თუ გამომცემლობები 4-5 ლარად ბეჭდავდნენ, დღეს 1.80 ლარის ფარგლებში დაიბეჭდება. მონოპოლიებს ფინანსური ინტერესებით ქმნიან, ამ შემთხვევაში კი, პირიქით, საბიუჯეტო ხარჯების დაზოგვა ხდება,”-ამბობს მინისტრი.
ტენდერი სასკოლო სახელმძღვანელოების ბეჭდვაზე განათლების სამინისტროს არ გამოუცხადებია. როგორც მინისტრი აცხადებს, მოლაპარაკებების საფუძველზე შეირჩა 4-5 სტამბა. მათი შერჩევის კრიტერიუმი კი, როგორც მარგველაშვილი ამბობს, წიგნის ბეჭდვის ფასი იყო.
“ეს არის ძალიან სერიოზული შეკვეთა. ადრე წიგნები საქართველოს ფარგლებს გარეთ იბეჭდებოდა ძირითადად, რაც აისახებოდა ქვეყანაში სასტამბო სიძლიერის საკითხზეც. ჩვენ დავიწყეთ მოკვლევა, ვისაც აქვს ამხელა შეკვეთის “გაქაჩვის” შესაძლებლობა და მათ გარანტია მოგვცეს, რომ არ ჩააგდებენ შეკვეთას.”
“ნებისმიერი ინტელექტუალური საკუთრების გარანტი სამართლებრივ საზოგადოებაში არის კონტრაქტი, რომლის დარღვევაშიც ბრალს არავინ მდებს. ვიცავ მის ყველა პირობას. შესაბამისად, ვერ ვხვდები, რას ვარღვევ.”
როგორც ის ამბობს, გაკვირვებულია, რატომ გააჩინა ამდენი კითხვა აღნიშნულმა საკითხმა მაშინ, როდესაც არავინ ინტერესდება, რა ხდებოდა აქამდე გამომცემლობების საკითხის ირგვლივ.