65 არასამთავრობო ორგანიზაცია მოითხოვს, რომ საქართველოს პარლამენტმა შექმნას დროებითი საგამოძიებო კომისია აფგან მუხთარლის გატაცების საქმესთან დაკავშირებით, რადგან ფერხდება ამ საქმის გამოძიების პროცესი.

ორგანიზაციები მიიჩნევენ, რომ საკმარისი დრო გავიდა იმისათვის, რომ საქმე გამოეძიებინათ. პროცესის გაჭიანურება კი ლახავს ქვეყნის იმიჯს, რადგან ევროსასამართლოს რეზოლუციაშიც აფგან მუხთარლის საქმეზე, ცალსახადაა მითითებული, რომ საქართველოს ხელისუფლებამ ნათელი უნდა მოჰფინოს იმას, თუ როგორ მოხვდა ჟურნალისტი თბილისიდან ბაქოში.

განცხადებას ხელს აწერენ:

აფგან მუხთარლი თბილისის ცენტრიდან 29 მაისს გაუჩინარდა, ხოლო გამოძიება შსს-მ დაიწყო 30 მაისს, მუხთარლის ცოლის, ლეილა მუსტაფაევას განცხადების საფუძველზე. მუხთარლი ამბობს, რომ ის თბილისიდან გაიტაცეს ადამიანებმა, რომლებსაც ეცვათ საქართველოს შსს კრიმინალური პოლიციის ფორმები. მისი თქმით, თავზე ტომარა ჩამოაცვეს და ისე გადაიყვანეს აზერბაიჯანის საზღვარზე, სადაც დააპატიმრეს. აზერბაიჯანის საგამოძიებო უწყების ცნობით, მუხთარლიმ თვითონ გადაკვეთა საზღვარი, სადაც ის დააკავეს კონტრაბანდული ფულის გადატანის ბრალდებით.

მუხთარლის დაკავებას მასობრივი საპროტესტო აქციები მოჰყვა თბილისში. მუხთარლის საქმის გამოძიებას პროკურატურის მიერ ითხოვდა დაკავებულის ოჯახი, თუმცა პროკურატურამ ეს საქმე მუხთარლის გატაცებიდან 1.5 თვის შემდეგ გადაიბარა. გუშინ, 19 ივლისს მუხთარლის ადვოკატებმა სტრასბურგის ადამიანის უფლებათა სასამართლოს მიმართეს საქართველოსა და აზერბაიჯანის წინააღმდეგ.